Դանիայի վարչապետ Մետե Ֆրեդերիկսենը մեղադրել է ԱՄՆ-ին Գրենլանդիայի վրա «անընդունելի ճնշում» գործադրելու մեջ՝ խոստանալով դիմակայել դրան: Նրա հայտարարությունը հնչել է նախքան Թրամփի վարչակազմի անդամների կողմից Արկտիկական կղզի կատարվող չհրավիրված այցը: Ֆրեդերիկսենը նշել է, որ ԱՄՆ փոխնախագահ ՋԴ Վենսի կողմից հայտարարված այցը «այն չէ, ինչ Գրենլանդիային պետք է կամ ցանկանում է»:
Նույն օրը՝ նրա խոսքերից մի քանի ժամ անց, Սպիտակ տունը նոր անակնկալ մատուցեց. ԱՄՆ փոխնախագահ ՋԴ Վենսը հայտարարեց, որ այս շաբաթ կմիանա իր կնոջը՝ Գրենլանդիա մեկնելու համար: «Ուշայի՝ ուրբաթ օրը Գրենլանդիա կատարելիք այցի շուրջ այնքան մեծ ոգևորություն կար, որ ես որոշեցի չթողնել, որ նա մենակ վայելի այդ ամենը, ուստի կմիանամ նրան», – ասել է Վենսը X-ում տեղադրված տեսանյութում: Նա հավելել է. «Հանդես գալով նախագահ Թրամփի անունից՝ մենք ցանկանում ենք ամրապնդել Գրենլանդիայի ժողովրդի անվտանգությունը, քանի որ դա կարևոր է համաշխարհային անվտանգության պաշտպանության համար»:
Դեռևս Վենսի հայտարարությունից առաջ Ֆրեդերիկսենը դանիական TV 2 հեռուստաալիքին ասել է. «Այս իրավիճակում Գրենլանդիայի և Դանիայի վրա գործադրվող ճնշումն անընդունելի է, և մենք կդիմակայենք դրան»: Նա նաև հերքել է այն պնդումը, թե այցը կարող է մասնավոր բնույթ ունենալ՝ ասելով. «Հնարավոր չէ մասնավոր այց կատարել, երբ խոսքը վերաբերում է այլ երկրի պաշտոնական ներկայացուցիչներին»:
Ինչ վերաբերում է Թրամփի՝ Գրենլանդիան ձեռք բերելու սպառնալիքներին, Ֆրեդերիկսենը կարծում է, որ դրանք պետք է լուրջ ընդունել: «Նախագահ Թրամփը լուրջ է տրամադրված… Նա ցանկանում է Գրենլանդիան: Հետևաբար, այս ամենը չի կարելի դիտարկել առանձին՝ այլ համատեքստերից», – ասել է նա Danmarks Radio-ին:
