Եվրախորհրդարանը բանաձև ընդունեց՝ Բաքվից պահանջելով անհապաղ ազատ արձակել հայ գերիներին: Այն ընդունվեց 523 կողմ, 3 դեմ և 84 ձեռնպահ ձայներով։
«Ադրբեջանի կողմից հայ պատանդների, այդ թվում՝ Լեռնային Ղարաբաղի բարձրաստիճան քաղաքական ներկայացուցիչների ապօրինի ձերբակալումը և նրանց դեմ շինծու դատավարությունները» վերտառութամբ բանաձևը՝
● դատապարտում է Ադրբեջանի կողմից հայ պատանդների դեմ անմարդկային վերաբերմունքը և պահանջում նրանց անհապաղ և անվերապահ ազատ արձակումը.
● խոր մտահոգություն է հայտնում խոշտանգումների և դաժան վերաբերմունքի դեպքերի վերաբերյալ և կոչ է անում անկախ հետաքննություն անցկացնել այդ խախտումների վերաբերյալ.
● Ադրբեջանի իշխանություններին կոչ է անում կատարել իրենց միջազգային պարտավորությունները, ներառյալ՝ Ժնևի կոնվենցիան և Մարդու իրավունքների եվրոպական կոնվենցիան.
● ԵՄ-ից և միջազգային կազմակերպություններից պահանջում է նպաստել մարդասիրական և բժշկական առաքելությունների տեղակայմանը, որպեսզի գնահատեն պատանդառնված անձանց պայմանները.
● ընդգծում է հայ քաղբանտարկյալներին ազատ արձակելու, նրանց պաշտպանությունն ապահովելու և նրանց նկատմամբ դաժան վերաբերմունքի համար պատասխանատու անձանց պատասխանատվության ենթարկելու դիվանագիտական ջանքերի հրատապ անհրաժեշտությունը.
● կոչ է անում Խորհրդին՝ նպատակային պատժամիջոցներ կիրառել Ադրբեջանի պաշտոնատար անձանց նկատմամբ, որոնք պատասխանատու են Մարդու իրավունքների խախտումների մասին հաղորդումների համար, այդ թվում՝ դատավորներ Զեյնալ Աղաևի, Ջամալ Ռամազանովի և Անար Ռզաևի նկատմամբ.
● խստորեն դատապարտում Է ՄԱԿ-ի մարմինների և Կարմիր խաչի միջազգային կոմիտեի գրասենյակները փակելու Ադրբեջանի կառավարության որոշումը, ինչը լրջորեն խոչընդոտում է միջազգային մարդասիրական ջանքերին և մոնիթորինգի մեխանիզմներին,
● կոչ է անում միջազգային քրեական դատարանին և վերջինիս գլխավոր դատախազին՝ հետաքննել Լեռնային Ղարաբաղի հայ բնակչության նկատմամբ բռնի տեղահանումների, հետապնդումների և էթնիկ զտումների վերաբերյալ գործերը.
● ողջունում է ՄԱԿ-ի Մարդու իրավունքների գերագույն հանձնակատարի հայտարարությունը, որը պահանջում է անվերապահ ազատ արձակել և անվտանգ վերադարձնել Ադրբեջանում ապօրինի պահվող բոլոր ռազմագերիներին, պատանդներին և այլ կալանավորված անձանց, այդ թվում՝ Լեռնային Ղարաբաղի բարձրաստիճան պաշտոնյաներին:
