Այսօր Լեհաստանի մայրաքաղաք Վարշավայում մեկնարկում է «Արևելյան գործընկերության» անդամ երկրների ղեկավարների գագաթնաժողովը, որի ընթացքում քննարկվելու է Եվրամիության մերձեցման ծրագրերը նախկին ԽՍՀՄ վեց հանրապետությունների` Հայաստանի, Բելառուսի, Ադրբեջանի, Ուկրաինայի, Մոլդովայի և Վրաստանի հետ: Լեհաստանը, որը այս ծրագրի «կնքահայրերից» մեկն է, հույս ունի, որ հնարավոր կլինի ավարտել Եվրամիության և այս երկրների միջև ազատ տնտեսական գոտի ստեղծելու բանակցությունները, և դա տեղի կունենա մինչև այս տարվա վերջը, երբ կավարտվի Լեհաստանի նախագահության ժամկետը: Այս մասին հաղորդում է «Ազատություն» ռադիոկայանը:
Նշվում է, որ վերջին շրջանում սկսել են խնդիրներ ծագել մասնավորապես Ուկրաինայի հետ, որտեղ նահանջ է արձանագրվել ժողովրդավարական բարեփոխումների իրականացման առումով: Եվրամիությունում դժգոհ են նախկին վարչապետ Յուլիա Տիմոշենկոյի դեմ սկսված դատավարությամբ և վերջինիս ձերբակալության փաստով: Բելառուսի նախագահ Ալեքսանդր Լուկաշենկոն չի հրավիրվել այս գագաթնաժողովին, քանի որ նրա մուտքը ԵՄ երկրներ արգելված է: Հայաստանի պատվիրակությունն այս գագաթնաժողովում գլխավորում է Սերժ Սարգսյանը, որը ԱՄՆ և Ֆրանսիա այցելություններից հետո այսօր ժամանում է Լեհաստան:
Հիշեցնենք, «Արևելյան գործընկերության» ծրագիրը հռչակվել է 2009 թ. Պրահայում: Դրա միջոցով Եվրամիությունը փորձում է նախկին ԽՍՀՄ 6 հանրապետությունների հետ իրականացնել ինտեգրացիոն որոշակի ծրագրեր, այդ թվում` վիզային ռեժիմի դյուրացում և առևտրի ազատ գոտու ստեղծում:
