Հյուսիսային Իռլանդիայի Բանգոր բնակավայրում ֆերմեր Ալան Գրեհեմը ընդհատել է կիսամերկ երգչուհի Ռիհաննայի՝ իր դաշտում իրականացվող տեսահոլովակի նկարահանումները:
Ինչպես հաղորդում է Euromag ամսագիրը, սկզբում Գրեհեմը թույլատրել է երգչուհուն նկարահանումներ անցկացնել We Found Love երգի տեսահոլովակի համար: Նա, սակայն, խոստովանել է, որ այդ ժամանակ դեռ ոչինչ չգիտեր 23-ամյա փոփ-երգչուհու մասին:
Երբ ֆերմերն իր տրակտորով անցնելիս է եղել դաշտով և տեսել է կիսամերկ երգչուհուն, նրան դա դուր չի եկել:
«Ինձ դա անընդունելի թվաց: Ես խնդրեցի նրանց դադարեցնել նկարահանումները, ինչը և նրանք արեցին: Ես խոսեցի Ռիհաննայի հետ և հույս ունեմ, որ նա ինձ հասկացավ»,- պատմել է Գրեհեմը:
Կիսամերկ Ռիհաննային տեսնելով դաշտի մեջտեղում՝ տեղի վարորդները կանգնեցրել են մեքենաները և սկսել նայել նրան, ինչի հետևանքով ճանապարհին խցանում է առաջացել: Իսկ դպրոցականները բջջային հեռախոսներով սկսել են նկարել երգչուհու պարը:
