Ինչպես հաղորդում է China Daily թերթը, 2011-2015 թթ. Չինաստանը իր տնտեսական 12-րդ հնգամյակի ընթացքում պատրաստվում է 1.5 տրլն դոլարի ներդրումներ կատարել տնտեսության այն ոլորտներում, որոնք կապված են բարձր տեխնոլոգիաների հետ:
Հղում անելով չինական կառավարությունում իր անանուն աղբյուրին՝ թերթը գրում է. «Չինաստանի կառավարությունը դիտարկում է առաջիկա 5 տարիներին տնտեսության յոթ նոր ռազմավարական ոլորտներում տարեկան մինչև 2 տրլն յուան (300 մլրդ դոլար) ներդրումներ կատարելու մասին հարցը»: Այդ ոլորտներն են` այլընտրանքային էներգետիկա, բիոտեխնոլոգիաներ, նոր սերնդի ինֆորմացիոն տեխնոլոգիաներ, էներգետիկա, բարձր տեխնոլոգիաների համար նախատեսված սարքավորումներ, մեքենաշինություն, էկոլոգիա: Սա թույլ կտա Չինաստանին էժան ապրանքների մատակարարից դառնալ «բարձր տեխնոլոգիաներ արտահանող երկիր»: Կառավարությունը նախատեսում է, որ ներդրվող գումարները կլինեն ոչ միայն պետական, այլև կիրականացվեն նաև մասնավոր ներդրողների կողմից:
