Թուրքական gazete5-ի փոխանցմամբ՝ Աշխատանքի միջազգային կազմակերպությունը (ILO) և Տնտեսական համագործակցության ու զարգացման կազմակերպությունը (OECD) հրապարակել են աշխարհի տնտեսապես ամենազարգացած 20 երկրներում (G-20) զբաղվածության մակարդակին առնչվող զեկույցը։
Այդ զեկույցի համաձայն՝ չնայած 2008 թվականին սկսված գլոբալ տնտեսական ճգնաժամին, G-20-ի երկրները վերջին 3 տարիներին բարելավել են իրենց բնակչության զբաղվածության ցուցանիշները։
Թուրքիան վերջին 3 տարիներին բնակչության զբաղվածության աճի ցուցանիշով զբաղեցրել է առաջին տեղը, ապա գալիս են Ինդոնեզիան, Բրազիլիան ու Գերմանիան։ Ամենավատ արդյունքները գրանցվել են Իսպանիայում, Հարավային Աֆրիկայում ու ԱՄՆ-ում։
Նույն զեկույցի համաձայն՝ գործազրկության ամենամեծ աճը գրանցվել է Իսպանիայում, ԱՄՆ-ում ու Մեծ Բրիտանիայում։ Գործազրկության կրճատման ցուցանիշով G-20-ում առաջատարները Բրազիլիան ու Ինդոնեզիան են։
Հիշեցնենք, որ օրեր առաջ Թուրքիայի փոխվարչապետ Ալի Բաբաջանը հայտարարեց, որ Թուրքիան նպատակադրվել է 2023 թվականին (Թուրքիայի Հանրապետության հիմնադրման 100-ամյակին) տեղ զբաղեցնել տնտեսապես ամենազարգացած երկրների լավագույն տասնյակում.
«Ներկայումս Թուրքիան այդ ցանկում զբաղեցնում է 16-րդ տեղը։ 2008-2009 թվականների գլոբալ տնտեսական ճգնաժամը, որն առաջին հերթին լրջորեն հարվածեց եվրոպական երկրներին, հեշտացրել է Թուրքիայի գործը։ Այդ ճգնաժամը նպաստելու է լավագույն 10 երկրների թվում Թուրքիայի ընդգրկվելուն»։
