«Ղարաբաղի հարցում հավանականությունը մեծ է, որ ոչինչ, ոչ մի առաջընթաց չի լինի, ոչինչ չի լինի նաև Հայաստան -Թուրքիա հարաբերություններում, թեև արձանագրությունները հետ բերելով` Թուրքիան ձգտում է ցույց տալ, որ հայ-թուրքական հարաբերություններն իր ուշադրության կենտրոնում են»,- կարծիք հայտնեց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը` մեկնաբանելով տարածաշրջանային վերջին զարգացումներն ու միտումները:
Նրա խոսքերով` մի շարք պետություններ մրցակցություն են ծավալում, որի սրման դեպքում մեր տարածաշրջանում գործերը կտրուկ կվատանան: «Ու այդ ֆոնի վրա կանխատեսելի ապագայում մեր խնդիրները չեն կարող լուծվել»,- համոզմունք հայտնեց բանախոսը:
Մեկնաբանելով արձանագրությունները Թուրքիայի խորհրդարան վերադարձնելու հարցը` Կ. Մանոյանն ասաց, որ դա «ոչինչ չի նշանակում, քանի որ իրենք վավերացման ուղղությամբ անգամ մեկ քայլ չեն արել: Ըստ նրա` արձանագրություններն օրակարգում պահելով, Թուրքիան ուզում է ապացուցել, թե կա գործընթաց, ու այդ գործընթացի պատրանքը կարող է Հայաստանի վրա ճնշում գործադրելու նպատակով օգտագործվել:
«Թուրքիան Հայաստանի զիջողական կեցվածքի դեմ փորձում է նախապայմանների լեզվով խոսել: Թուրքիայի համար ցանկալի տարբերակ է արձանագրությունները բերել խորհրդարան ու դրանք չվավերացնել»,- նշեց բանախոսը:
Անդրադառնալով ռուսաստանյան վերջին զարգացումներին` Մանոյանն ասաց, որ դա կարող է ազդել ղարաբաղյան հարցի վրա, սակայն դժվար թե ազդի մեր ներքաղաքական զարգացումների վրա, թեև Պուտինի ու Մեդվեդևի կառավարման ոճի տարբերությունը կարող է որոշակի ազդեցություն ունենալ: Նրա կարծիքով` Ղարաբաղի հարցի շուրջ բանակցությունները կշարունակվեն, թեև ոչ այնքան հաճախ: «Նախագահների հանդիպման ակնկալիք չունեմ»,- ասաց նա` նշելով, որ ադրբեջանցիները փորձում են քաղաքականապես մի քիչ զուսպ լինել` կապված հայկական ուժերի` անօդաչու ինքնաթիռ ոչնչացնելու հետ:
