Անհայտ ցանցահենները սեպտեմբերի 27-ին կոտրել են Հարվարդի համալսարանի պաշտոնական կայքը, ուր տեղադրել են Սիրիայի գործող ռեժիմին աջակցող տեղեկատվություն: Այս մասին հաղորդում է BBC-ն: Կայքի գլխավոր էջում հրապարակվել է Բաշար Ալ-Ասադի նկարը, որի տակ կա «Սիրիայի էլեկտրոնային բանակը եղել է այստեղ» գրությունը: Կայքում նաև կան հաղորդագրություններ, որոնք մեղադրում են ԱՄՆ-ին Սիրիայում «սպանդ կազմակերպելու» համար:
Բացի այդ, ցանցահենները Հարվարդի կայքում նաև ահաբեկչական բնույթի սպառնալիքներ են թողել: «Սիրիայում բնակվում է 23 միլիոն մարդ, որոնք կարող են վերածվել 23 միլիոն շարժական ռումբերի: Պատկերացրե՛ք, թե մենք ինչ կարող ենք անել ձեզ հետ»,- ասվում է հաղորդագրություններից մեկում:
Ցանցահենների հաղորդագրությունները մեկ ժամ շարունակ մնացել են կայքի էջերում: Այս պահին կայքը գործում է նորմալ ռեժիմով:
