Թուրքիայի տնտեսական և սոցիալական հետազոտությունների հիմնադրամը (TESEV) հրապարակել է Թուրքիայում բնակվող հայերի խնդիրներին նվիրված հատուկ զեկույց, որը ստացել է «Լսել Թուրքիայի հայերին. հարցեր, պահանջներ, լուծման առաջարկներ» անվանումը։
Դրանում նշված է. «Թուրքական պետությունը պետք է ֆինանսապես աջակցի հայկական դպրոցների համար նախատեսված դասագրքերի հրատարակմանն ու ուսուցիչների աշխատավարձերի ավելացմանը։ Համալսարաններում պետք է բացվեն հայոց լեզվի ու գրականության ամբիոններ։ Պետք է միջոցներ հատկացվեն նաև հայկական ռադիոյի ու կինոթատրոնի ստեղծմանը։
Պետությունը պետք է սահմանադրական հավասարություն ապահովի բոլոր էթնիկ խմբերին, «թուրքականության դեմ վիրավորանք» կետը (301-րդ հոդված) կիրառի նաև մյուս էթնիկ ու կրոնական փոքրամասնությունների դեմ։ Պահանջներից մեկն էլ Ստամբուլի Ուսքյուդար շրջանում գտնվող Սուրբ Խաչի Դպրևանք դպրոցում հոգևորականներ պատրաստելն է։
Պետությունը պետք է կանխի հայ ինքնության ու մշակույթի ձուլումը, ինչպես որ նախատեսված է Լոզանի պայմանագրով։ Օրենսդրական փոփոխությունների շնորհիվ Թուրքիայում բնակվող հայաստանցի երեխաները պետք է մայրենի լեզվով սովորելու հնարավորություն ստանան ՄԱԿ-ի՝ երեխաների իրավունքների մասին կոնվենցիային համապատասխան։ Պատմական դասագրքերից պետք է վերացվեն հայերի հանդեպ թշնամություն և ատելություն սերմանող հատվածները և խտրական արտահայտությունները։
Վերականգնված ու վերանորոգված հայկական պատմական եկեղեցիները պետք է հանձնվեն Պոլսո Հայոց պատրիարքարանին և դրանցում թույլատրվեն պատարագների մատուցումը։ Պատրիարքարանը պետք է ստանա իրավաբանական անձի կարգավիճակ։ Պետք է ամբողջովին բացահայտվի Ստամբուլի Շիշլի թաղամասում սպանված հայկական «Ակօս» թերթի նախկին խմբագրապետ Հրանտ Դինքի սպանությունը և պատասխանատվության ենթարկվեն բոլոր մեղավորները»։
Զեկույցում անդրադարձ է կատարված նաև Հայաստանի ու Թուրքիայի հարաբերությունների կարգավորմանը. «Հայ-թուրքական սահմանի բացման մասին արձանագրությունների կիրառումը կնպաստի երկու երկրների հարաբերությունների կարգավորմանը։ Պետք է կենսագործել «զրո խնդիր հարևանների հետ» քաղաքականությունը՝ մի կողմ դնելով Ղարաբաղի ու Հայոց ցեղասպանության հարցերը»:
