Ռուսական Regnum լրատվական գործակալության փոխանցմամբ՝ Հայաստանում ԱՄՆ նախկին դեսպան Ջոն Էվանսը «Օրակարգ» թերթին տված հարցազրույցում անդրադարձել է հայ-թուրքական հարաբերությունների կարգավորմանը.
«Ավելի արդյունավետ կլիներ, եթե Հայաստանն ու Թուրքիան սկսեին ոչ մեծ նախաձեռնություններից և ոչ թե փորձեին միանգամից լուծել բոլոր հարցերը։ Չեմ կարծում, թե հայ-թուրքական հարաբերությունների կարգավորման գործընթացում բարդությունների ի հայտ գալու համար մեղավոր է կոնկրետ մի կողմը։ Ես կարծում եմ, որ գործընթացն արգելակվել է երկու կողմի մեղավորության պատճառով, քանի որ սեղանի վրա դրվել էին այնպիսի գործոններ, որոնք լուծման ենթակա չէին»։
Էվանսը նաև հայտնել է, որ շարունակում է աշխատել միջազգային արենայում Հայաստանի դերակատարության և Հայոց ցեղասպանության մասին իր գրքի վրա։ Էվանսը հավելել է, որ չի ափսոսում դիվանագետի իր կորսված կարիերայի և, ի հակառակ ԱՄՆ-ի պաշտոնական քաղաքականության, «Ցեղասպանություն» եզրույթն արտաբերելու համար։
Հիշեցնենք, որ 2006 թվականի սեպտեմբերին դեսպան Էվանսը 1915 թվականին Օսմանյան կայսրությունում հայերի հետ տեղի ունեցած իրադարձությունները որակել էր որպես «Ցեղասպանություն», ինչի համար հետ էր կանչվել Հայաստանից, ապա վերադարձել և տվյալ պաշտոնում մնացել ևս 1.5 տարի։ Սակայն դա անհետևանք չէր մնացել, և ԱՄՆ Սենատը նրան չէր հաստատել նոր պաշտոնում։
