ՀՀԿ խմբակցության քարտուղար Էդուարդ Շարմազանովն այսօր հրավիրված մամլո ասուլիսի ընթացքում, անդրադառնալով ՀԱԿ-իշխանություն երկխոսության առկախմանը, նկատեց, որ դա Կոնգրեսի խղճի վրա է, ապա գալով անհնազանդության վերաբերյալ Կոնգրեսի կոչերին, նկատեց, որ դա նախընտրական հնարք է, և այս մասին կոնգրեսականներն առաջին անգամ չեն հայտարարում:
Ինչ վերաբերում է ապագա ընտրություններում իշխող կուսակցության հնարավորություններին, նա նկատեց, որ ՀՀԿ-ն շանսեր ունի նորից հաղթելու:
Անդրադառնալով հանրահավաքում Արամ Մանուկյանի կողմից տոպրակով ՀՀԿ-ականների անդամատոմսերը ցույց տալու փաստին, Շարմազանովը նկատեց, որ իր հայրենակից Ա. Մանուկյանը լավ կլիներ, որ ցույց տար մեկ այլ տոպրակ, որտեղ Ալիկ Արզումանյանի, Խաչատուր Քոքոքոբելյանի, Արարատ Զուրաբյանի, Կարապետ Ռուբինյանի անդամատոմսերն են, ովքեր դուրս են եկել ՀԱԿ-ից: Նա հավելեց նաև, որ ՀՀԿ-ից արտահոսք չկա: Իսկ տարեվերջին տեղի կունենա ՀՀԿ համագումարը, որից հետո ՀՀԿ-ն կքննարկի նախընտրական ցուցակը:
«Մենք բարեփոխել ենք ընտրական օրենսգիրքը, բռնությամբ, բախումներով ոչինչ չի փոխվի, մենք բոլորս ենք նույն նավի մեջ: Մեր երկրում քաղաքական պրոցեսները պետք է գնան նորմալ քաղաքական հունով»,- նկատեց Շարմազանովը:
Եթե ՀԱԿ-ը անցնի պերմանենտ հանրահավաքների, ի՞նչ պետք է անի իշխանությունը` հարցրեցին լրագրողները: Շարմազանովը նշեց, որ ընդդիմության իրավունքն է` օրենքի սահմաններում իր պայքարը շարունակի. «Եթե այդ հանրահավաքները օրինական են` իրենց խնդիրն է, թե ինչպես են իրենց գործունեությունը շարունակում»:
