Նոյեմբերի 7-ին Ադրբեջանի նախագահ Իլհամ Ալիևը բարձրագույն զինվորական՝ գեներալ-գնդապետի կոչման է արժանացրել պաշտպանության նախարարի տեղակալ, ցամաքային զորքերի հրամանատար Հիքմեթ Միրզոևին, որ այդ պաշտոնին նշանակվել է մի քանի ամիս առաջ:
Մինչ այդ Հիքմեթ Միրզոևը Բաքվի բարձրագույն ռազմական ուսումնարանն ավարտել է 1989թ.-ին, ղարաբաղյան առաջին պատերազմին մասնակցել է որպես խորքային հետախուզության գումարտակի հրամանատար։ Այնուհետև ծառայությունը շարունակել է հատուկ նշանակության զորքերում, ապրիլյան քառօրյա ռազմագործողությունների մասնակից է։
2018թ. Միրզոևն արժանացել է գեներալ-մայորի կոչման և նշանակվել հատուկ նշանակության զորախմբի հրամանատար: Կենսագրական տեղեկություններից ո՞րն է իրական, ո՞րը՝ վերագրված՝ նրա նկատմամբ Ադրբեջանի բարձրագույն ղեկավարության վերաբերմունքի դրսևորում է:
Բայց առկա է ակնհայտ իրողություն. Հիքմեթ Միրզոևի՝ որպես ղարաբաղյան երկրորդ պատերազմի «հերոսի» և հատկապես Շուշիի «ազատարարի» կերպարն ադրբեջանական կողմը բացահայտել կամ ստեղծել և հանրությանը սկսել է ներշնչել վերջին մի քանի ամիսներին, երբ նա Իլհամ Ալիևի հրամանագրով նշանակվեց ցամաքային զորքերի հրամանատար-պաշտպանության նախարարի տեղակալ։
Ադրբեջանական որոշ աղբյուրներ դեռևս այն ժամանակ են ենթադրել, որ Միրզոևը պաշտպանության փոխնախարար է նշանակվել, որպեսզի հարմար պահի փոխարինի Զաքիր Հասանովին: Վերջինս, ինչպես բազմիցս վկայել են իրազեկ շրջանակները, զորքերում, զորատեսակների հրամանատարների մոտ բարձր հեղինակություն չի վայելում, մարտական կենսագրություն չունի, պաշտպանության նախարար է նշանակվել ՆԳՆ ներքին զորքերի հրամանատարի պաշտոնից:
Հասանովը հունիսի 8-ին հատել է օրենքով զինվորական ծառայության համար սահմանված առավելագույն տարիքի շեմը, լրացել է նրա 65-ամյակը: Բացի այդ, Բաքվի զինվորական դատարանը քննում է 143 միլիոն մանաթի յուրացման քրեական գործը, բացահայտվում են բարձրաստիճան զինվորականների անուններ:
Դրան գումարվել է նաև 2017թ. Թարթառի բանակային կորպուսով շուրջ տասը զինծառայողի սպանության, հարյուրավորների կտտանքի ենթարկելու գործի վերաքննությունը: Սպանվածների հարազատները, կտտանքների ենթարկվածները պահանջում են քրեական պատասխանատվության ենթարկել պաշտպանության նախարար Հասանովին: Դատարանը սպանվածներից և տուժածներից հանել է հայերի օգտին լրտեսություն կատարելու մեղադրանքը: Փաստացի զինվորները ենթարկվել են դատաստանի:
Այդ մասին, իհարկե, բոլորը քաջատեղյակ էին հենց 2017-ին, իշխանության ամենաբարձր ատյաններում գիտեն, թե ով և ինչպես է յուրացրել 143 միլիոն մանաթը: Եվ եթե այդ մասին բարձրաձայնվում է այսօր, ուրեմն պաշտպանության նախարար Զաքիր Հասանովի պաշտոնավարման թույլատրված ժամանակն սպառվում է կամ արդեն իսկ սպառվել է:
Նախարարի տեղակալ Միրզոևին շնորհելով գեներալ-գնդապետի կոչում, այսինքն՝ զուտ սպայական աստինահարգությամբ նրան հավասարացնել վերադասին՝ մի բան է հուշում. Իլհամ Ալիևը հրապարակայնացրել է, որ պաշտպանության հաջորդ նախարար կնշանակվի գեներալ-գնդապետ Հիքմեթ Միրզոևը։ Ադրբեջանի զինված ուժերին, որևէ զորատեսակի Զաքիր Հասանովը որպես ռազմական գործիչ տալու ոչինչ չի ունեցել։ Հիքմեթ Միրզոևը հատուկ նշանակության զորախմբի հրամանատարի փորձառություն ունի։ Բայց որքանո՞վ է նրա կենսագրությունն իրական, որքանով՝ առասպելական։ Ապրիլյան քառօրյա մարտերում, օրինակ, նրա հրամանատարության ենթակա «Յաշման» որևէ հաջողության չի հասել։ Իսկ գուցե Ալիևը Միրզոևի միջոցով բացառապես ներքաղաքական խնդիր է ուզում լուծել։
