Այսօր Հայաստանի Ամերիկյան համալսարանի «Մանուկյան» սրահում մեկնարկեց «Կովկասյան ֆաունայի կենսաբազմազանությունը և նրա խնդիրները» թեմայով գիտական համաժողովը: Համաժողովին մասնակցելու են եկել գիտնականներ կովկասյան բոլոր երկրներից` Վրաստան, Թուրքիա, Բուլղարիա, Լեհաստան, Ռուսաստան և Պարսկաստան: Գիտնականները համաժողովի ընթացքում կարծիքներ կփոխանակեն` ելնելով իրենց հետազոտություններից, և կառաջարկեն կովկասյան ֆաունայի պահպանության հնարավոր ճանապարհները: Գիտական համաժողովի շրջանակում նախատեսվում են ներկայացումներ, տարբեր հետազոտություններ, քննարկումներ և արշավ, որով կազմակերպիչները ցույց կտան Հայաստանի բնության մի փոքր մասը:
Համաժողովի կազմակերպիչներն են Հայաստանի Ամերիկյան համալսարանը, ՀՀ գիտությունների ազգային ակադեմիան և Կենդանաբանության հիդրոէկոլոգիայի գիտական կենտրոնը: Համաժողովի շրջանակում գիտական զեկույցները լինելու են սեպտեմբերի 26-28-ը, իսկ արշավը սեպտեմբերի 29-ին: «Կովկասի կենդանական և բուսական աշխարհը վտանգված է: Այսօր ոչնչացման եզրին են հարյուրավոր կենդանիներ և բույսեր: «Կարմիր գրքում» այսօր կա 100 թռչուն, նույնքան միջատ և մոտավորապես 60 տեսակի կաթնասուն»,- «Առաջին լրատվական»-ի հետ զրույցում նշեց գիտաժողովի կազմակերպիչ «Հակոբյան» բնապահպանական կենտրոնի տնօրեն Կարեն Աղաբաբյանը` նշելով, որ համաժողովը նվիրված է Կովկասի կենսաբազմազանությանը, մասնավորապես` հետազոտման և պահպանության խնդիրներին: Նա կարևորեց այդ փաստը, քանի որ Կովկասը համարվում է կենսաբազմազանության 6 գլոբալ թեժ կետերից մեկը: «Սա նշանակում է, որ Կովկասում կան բազմաթիվ կենդանիներ և բույսեր, որոնք չկան երկրագնդի վրա ոչ մի ուրիշ տեղ: Այսպիսով անհրաժեշտ են հետազոտություններ որոնք ցույց կտան թե ինչ եղանակով է հնարավոր համատեղել տնտեսական աճը և կենսաբազմազանության պահպանումը»,- եզրափակեց Կ.Աղաբաբյանը
