Vesty.go.il իսրայելական կայքը հայտնում է, որ հոկտեմբերի 19-ին Իսրայելի Ընդհանուր անվտանգության ծառայությունը և ոստիկանության կազմակերպված հանցավորության դեմ պայքարի առանձնացված կառույցը համատեղ իրականացրած գործողության արդյունքում ձերբակալեն են ծագում Ադրբեջանից յոթ վերաբնակիչների:
Նրանք կասկածվում են երկու տարի շարունակ Իրանի օգտին լրտեսության իրականացնելու մեջ, ինչի դիմաց վճարվել են կրիպտոարժույթով: Նախաքննության վարկածի համաձայն՝ այդ մարդիկ իրանական կողմին տեղեկություններ են փոխանցել Իսրայելի ռազմական հենակայանների, հրամանատարական կետերի, ՀՕՊ և հակահրթիռային պաշտպանության համակարգերի տեղաբաշխման վայրերի, ինչպես նաև առանձին իսրայելցիների մասին:
Հատուկ ծառայությունների աղբյուրներից լրատվամիջոցին հայտնի է դարձել, որ հիշյալ անձինք հոկտեմբերի 1-ին լուսանկարել և իրանական կողմին են փոխանցել Իրանի հրթիռային հարվածներից տուժած ռազմական օբյեկտները, որպեսզի Թեհրանում համոզված լինեն, որ նախանշված թիրախները խոցվել են: Իսրայելական դատարանն արտոնել է, որպեսզի իրավապահները հանրայնացնեն ձերբակալված ծագումով Ադրբեջանից վերաբնակիչների ինքնությունը: Ըստ մամուլի՝ նրանք են՝ Ազիզ Նիսանով, Ալեքսանդր Սադիկով, Իգալ Նիսան, Վյաչեսլավ Գուշին և Եվգենի Իոֆֆե: Մյուս երկու ձերբակալվածների ինքնությունը չի բացահայտվում, քանի որ նրանք «անչափահաս են»:
Խիստ ուշագրավ է, որ բոլոր ձերբակալվածները Հայֆայի և Իսրայելի հյուսիսային շրջանների բնակիչներ են, որտեղ վերջին շրջանում իսրայելական բանակի զորանաց է թիրախավորվել: Առնվազն չորս զինծառայող սպանվել է, շուրջ վեց տասնյակը՝ վիրավորվել: Նախաքննությունը հիմնավոր կասկածներ ունի, որ հենց այդ խումբն է «Հեզբոլլային» հայտնել բոլորովին վերջերս կառուցված զորանոցի կոորդինատները: Բոլոր ձերբակալվածներին ներկայացվել է պատերազմական իրավիճակում թշնամու օգտին լրտեսություն կատարելու մեղադրանք, խափանման միջոց է ընտրվել կալանքը: Ներկայացված մեղադրանքն ապացուցվելու դեպքում նրանց սպառնում է ցմահ ազատազրկում: Հայտնի չէ, թե իսրայելական դատարանն ինչ վճիռ է կայացրել անչափահասների նկատմամբ, ովքեր են նրանք և երբ են հաստատվել Իսրայելում:
Այս տեղեկատվությունը կարելի է համարել սենսացիոն, որովհետև ավելի քան քառորդ դար է, ինչ Բաքվի քարոզչությունը խոսում է Իսրայել-Ադրբեջան անխախտ բարեկամության, Իսրայելին ծագումով Ադրբեջանից հրեա վերաբնակիչների մատուցած ծառայություններից, նվիրվածությունից: Աղբյուրները, մինչդեռ, հայտնում են, որ լրտեսության մեջ կասկածվողներից մեկը «ռազմաճակատից դասալիք է»:
Ի՞նչ ուղղությամբ կընթանա ծագումով Ադրբեջանից վերաբնակիչների «լրտեսության գործով» դատավարությունը: Ծայրահեղ լարված հարաբերությունների պատճառով Իսրայելը և Իրանը հաղորդակցություն չունեն, ամենայն հավանականությամբ, երկուստեք վերահսկվում են նաև բջջային կապը և համացանցը:
Լրտեսության մեջ կասկածվող անձինք կապի ի՞նչ միջոցներով են հավաքագրած տեղեկությունները փոխանցել իրանական կողմին: Իսրայելի հատուկ ծառայությունները «պարզել են, որ նրանք տարածաշրջանում ունեցել են կուրատոր»: Խոսքը ո՞ր երկրի մասին է: Ձերբակալվածներն Ադրբեջանում հարազատներ ունե՞ն: Դատելով հրապարկված անուն-ազգանուններից, նրանցից երեք հուդայադավան թաթ կամ այսպես ասած՝ «լեռնական հրեա» է: Ադրբեջանում նրանք համահավաք բնակվում են Ղուբայի շրջանի Կրասնայա սլոբոդա ավանում, որտեղից է, ի դեպ, ռուսաստանցի սկանդալային հայտնի գործարար Գոդ Նիսանովը:
