Հայաստանի մարքեթինգի հայկական ասոցիացիան և Մարքեթինգի հայկական ակումբը ԱՄՆ Հյուսիսարևմտյան համալսարանի Ջ.Քելոգի մենեջմենթի բարձրագույն դպրոցի միջազգային մարքեթինգի պրոֆեսոր, մարքեթինգի դասական Ֆիլիպ Կոտլերի`Հայաստան այցին նախորդող միջոցառումների շրջանակում հանդիպում էին կազմակերպել ուսանողների համար:
Հանդիպման նպատակը, ըստ «Ֆիլիպ Կոտլերը Հայաստանում 11.11.11» ծրագրի ղեկավար Արմեն Սարգսյանի, ուսանողներին ծրագրի հիմնադրույթների հետ ծանոթացնելն է ու նախագծի մանրամասները ուսանողների հետ քննարկելը: Ներկայացնելով ծրագիրը` Ա.Սարգսյանը շեշտեց, որ Հայաստանում մարքեթինգային ոլորտը մի քանի տարի առաջ «շատ ցաքուցրիվ էր»: «Հիմա այս ծրագիրը որոշակի հարթակ կհանդիսանա: Մարքեթինգը` որպես գիտություն, շատ անհրաժեշտ է մեր երկրին: Լինել մարքեթինգի մասնագետ՝ նշանակում է լինել խելացի անձնավորություն, որն իր տեղը կգտնի մեր հասարակությունում»,- ասաց նա:
Այն հարցին, թե ինչու է ընտրվել հենց Ֆիլիպ Կոտլերը, որը Հայաստան է ժամանելու նոյեմբերին Սերժ Սարգսյանի հրավերով, վերջինս պատասխանեց, որ վերջինիս խիտ գրաֆիկի պատճառով իրենց շատ դժվարությամբ է հաջողվել նրան այստեղ հրավիրել, սակայն հենց պրոֆեսորն է ընտրել մեր երկիրը տարածաշրջանի երկրների թվից: «Նա իր ցանկությամբ է ընտրում այն երկրները, որոնք, իր պատկերացմամբ, համապատասխանում են մարքեթինգին: Պատճառն այն է, որ մենք թեև չունենք բնական ռեսուրսներ, բայց ունենք մարդկային կայուն ռեսուրս, որի զարգացմամբ կարող ենք զարգացնել մեր տնտեսությունը»,- նկատեց նա:
