Նիդեռլանդների արտաքին գործերի նախարար Ուրի Ռոզենթալը Եվրամիությանը կոչ է արել ճնշում գործադրել Ռուսաստանի Դաշնության վրա՝ Hermitage Capital ֆոնդի իրավաբան Սերգեյ Մագնիտսկու մահվան համար մեղավորներին պատժելու նպատակով:
Նախարարը երկրի պառլամենտին «Արտաքին քաղաքականության մեջ մարդու իրավունքները» վերնագրով զեկույց է ներկայացրել, որտեղ մասնավորապես նշվում է, որ Մագնիտսկու մահվան կապակցությամբ ինքը մտադիր է դիմել Եվրամիության ղեկավարությանը՝ ռուսական իշխանությունների վրա համապատասխան ճնշում գործադրելու խնդրանքով:
Ինչպես նշում է «Ազատություն» ռադիոկայանը, Նիդեռլանդների պառլամենտը 2011թ. հուլիսին մուտքի արտոնագրի սահմանափակումներ է կիրառել ռուսաստանցի 60 պաշտոնյաների համար, ում հանցավոր գործունեության մասին հրապարակել էր Մագնիտսկին: Վերջինս մեղադրվել էր հարկեր չվճարելու մեջ և 2009 թ. կասկածելի հանգամանքներում մահացել քննչական մեկուսարանում: