Թաիլանդի Սահմանադրական դատարանը «Փիա Թաի» կուսակցությունից վարչապետ Սրեթթա Թավիսինին մեղավոր է ճանաչել էթիկայի վարքականոնների խախտման մեջ և հեռացրել է նրան պաշտոնից։ Ինչպես տեղեկանում է Bangkok Post պարբերականից, այդ մասին ասված է դատական ատյանի հրապարակած որոշման մեջ։
Ինը դատավորներից հինգը քվեարկել է կառավարության ղեկավարի պաշտոնաթողության օգտին՝ նրան մեղավոր ճանաչելով խախտումների համար 2024 թվականի ապրիլին վարչապետի աշխատակազմում Փիչիթ Չինբանի՝ նախարար նշանակվելու ժամանակ։
Սրեթթա Թավիսինը Կառավարական տանը լրագրողներին հայտնել է, որ հարգում է դատարանի որոշումը։
«Ես այլևս իշխանություն չունեմ: Բոլոր լիազորություններն այժմ դրված են ժամանակավոր վարչապետի վրա», – ասել է նա:
Վարչապետի հետ մեկտեղ հրաժարական է տալիս նաև նրա կաբինետը։ Ակնկալվում է, որ կառավարության ժամանակավոր ղեկավարը կդառնա փոխվարչապետ և առևտրի նախարար Փումթամ Վեչայչայը «Փիա Թաի» կուսակցությունից: Ներկայացուցիչների պալատի (խորհրդարանի ստորին պալատ) պատգամավորներն այժմ պետք է քննարկեն և հաստատեն նոր վարչապետի թեկնածությունն այն թեկնածուների ցուցակից, որոնք նախկինում ներկայացված են եղել կուսակցությունների կողմից 2023 թվականի խորհրդարանական ընտրություններից հետո:
Եթե խորհրդարանականները չկարողանան վարչապետ ընտրել նշված թեկնածուներից, ապա կառավարության ժամանակավոր ղեկավարը կարող է հայտարարել Ներկայացուցիչների պալատի արձակման մասին։ Այդ դեպքում ընտրական հանձնաժողովը հինգ օրվա ընթացքում պետք է հայտարարի խորհրդարանական ընտրությունների օրը։ Սակայն տեղական դիտորդները նման արդյունքը քիչ հավանական են համարում և կանխատեսում են իշխող կոալիցիայի պահպանումը:
