Թուրքական Vatan թերթի փոխանցմամբ՝ երեկ երեկոյան Վանի նահանգի Չաթաք (Շատախ) շրջանում բախվել են Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) զինյալներն ու տեղի անվտանգության ուժերը։
Բախման արդյունքում զոհվել է 1 զինծառայող, 1 գյուղական պահապան։ Բացի այդ, վիրավորվել են նաև 3 գյուղական պահապաններ։ Վիրավորները ուղղաթիռով տեղափոխվել են Վանի հոսպիտալ։
Թուրքական անվտանգության ուժերը լայնամասշտաբ գործողություններ են ձեռնարկել PKK-ականներին հայտնաբերելու ուղղությամբ։
Հիշեցնենք, որ թեև PKK-ն հիմնադրվել է 1978 թվականին (հիմնադիր Աբդուլլահ Օջալան), Թուրքիայում նրա ակտիվ զինված պայքարը սկսվել է 1984 թվականին։ Դրա համար էլ պատահական չէ, որ արդեն 1985 թվականին Թուրքիայի քրդաբնակ շրջանների համար ստեղծվեց գյուղական պահապանների համակարգը։ Նրանք ենթարկվում են Ժանդարմերիայի հրամանատարությանը։
Ի դեպ, այս տարվա օգոստոսին Թուրքիայի տրանսպորտի նախարար Բինալի Յըլդըրըմը հայտնեց, որ 1984-2011 թվականներին PKK-ի դեմ մղած 27-ամյա պայքարում Թուրքիայի ուղղակի ծախսերը կազմել են 300 միլիարդ դոլար։ Սակայն անուղղակի ծախսերը շատ ավելի մեծ են՝ 700 միլիարդ դոլար։ Ընդհանուր առմամբ, PKK-ի դեմ 27-ամյա պայքարը Թուրքիայի վրա արժեցել է 1 տրիլիոն դոլար։
