Նյու Յորքում կայանալիք ՄԱԿ-ի Գլխավոր ասամբլեայի նստաշրջանի ընթացքում քննարկվելու է Պաղեստինի անկախության հարցը: Հայաստանում որոշ գործիչներ կարծում են, որ պետք է օգտվել այդ առիթից և Իսրայելին ասել, որ եթե ճանաչեն ԼՂ անկախությունը, ապա Հայաստանն էլ դեմ կքվեարկի Պաղեստինի անկախության ճանաչման բանաձևին:
ԵՊՀ քաղաքականության և մշակութային ուսումնասիրությունների կենտրոնի տնօրեն, արևելագետ Դավիթ Հովհաննիսյանը, սակայն, այդ կարծիքին չէ: «Առաջին լրատվականի» հետ զրույցում Հովհաննիսյանը նշեց, որ դա միամիտ քայլ կլինի, որովհետև պետք է հաշվի առնենք իրականությունը:
«Այսօր Իսրայելում օգտագործվող նավթի 50 տոկոսից ավելին ադրբեջանական է, Իսրայելը բավականին ակտիվ ռազմական համագործակցություն է ծավալում Ադրբեջանի հետ, այնպես որ՝ պետք չէ զբաղվել դատարկ բաներով, այլ պետք է պայմանավորվել ավելի` գուցե ոչ կարևոր թվացող, բայց իրականանալի փոքր հարցերի շուրջ»,- կարծիք հայտնեց Հովհաննիսյանը:
