Ռուսաստանն ապարդյուն փորձում է հասնել Աբխազիայի ու Հարավային Օսիայի միջազգային ճանաչմանը. Վրաստանի ԱԳՆ

News Georgia-ի փոխանցմամբ՝ Վրաստանի փոխարտգործնախարար Նինո Կալանդաձեն այսօր տեղի ունեցած ճեպազրույցի ժամանակ մեկնաբանել է Աբխազիայի ու Հարավային Օսիայի միջազգային ճանաչմանն առնչվող WikiLeaks-յան տեղեկատվությունը։

Հիշեցնենք, որ WikiLeaks-յան բացահայտումներում խոսք է գնում այն մասին, որ Աբխազիայի ու Հարավային Օսիայի անկախությունը ճանաչած երկրները յուրօրինակ նվերներ են ստացել Ռուսաստանի կողմից։ Օրինակ՝ Նիկարագուան դա անելու համար Մոսկվայից ստացել է 130 քաղաքային ավտոբուս և 1 մարտական ուղղաթիռ։

Վենեսուելան Ռուսաստանի հետ կնքել է մի շարք համաձայնագրեր, որոնք առնչվում են էներգետիկայի ու սպառազինության վաճառքի ոլորտներին։ Դրա շնորհիվ Վենեսուելան վաստակել է մի քանի միլիոն դոլար։ Նաուրուն Ռուսաստանից ստացել է 50 միլիոն դոլար։

Այս կապակցությամբ Կալանդաձեն հայտարարել է. «Ոչ ոք չգիտե, թե որքանով է հավաստի WikiLeaks-յան տեղեկատվությունը։ Մենք ո՛չ հաստատում, ո՛չ էլ հերքում ենք այդ փաստերը։ Սակայն այն, որ Ռուսաստանը Աբխազիայի ու Հարավային Օսիայի միջազգային ճանաչման համար ոչինչ (լծակներ, ճնշման մեխանիզմներ և դրամական միջոցներ) չի խնայել՝ դա հայտնի է միջազգային հանրությանը։

Ռուսաստանն ապարդյուն շարունակում է միջազգային մասշտաբով ճնշումներ բանեցնելու իր քաղաքականությունը՝ Աբխազիայի ու Հարավային Օսիայի միջազգային անկախությանը հասնելու համար»։

Հիշեցնենք, որ մինչ այս Աբխազիայի ու Հարավային Օսիայի անկախությունը ճանաչել են Ռուսաստանը (26.08.2008), Նիկարագուան (05.09.2008), Վենեսուելան (10.09.2009), Նաուրուն (15-16.12.2009)։ Մայիսի վերջին էլ բազմիցս հաստատվեց ու հերքվեց Վանուատուի կողմից միայն Աբխազիայի անկախության ճանաչումը։