Օգոստոսի 9-ին ՀԱԿ ակտիվիստների և ոստիկանության միջև տեղի ունեցած միջադեպի առիթով հարուցված քրեական գործը, ՀՀ գլխավոր դատախազի հանձնարարությամբ, ուղարկվել է հատուկ քննչական ծառայություն նախաքննությունը շարունակելու համար:
Գլխավոր դատախազության լրատվական ծառայության տեղեկացմամբ՝ գործը ՀՔԾ տեղափոխելու վերաբերյալ հանձնարարությունը Աղվան Հովսեփյանը տվել է սեպտեմբերի 16-ին:
Նշենք, որ ՀՀ ոստիկանության քննչական գլխավոր վարչությունում հիշյալ քրեական գործով իրականացված նախաքննության շրջանակներում որպես մեղադրյալ է ներգրավվել թվով 7 անձ. Տիգրան Առաքելյանը, որը մեղադրվում է ՀՀ Քրեական օրենսգրքի 258-րդ հոդվածի 3-րդ մասի 1-ին և 2-րդ կետերով և 316-րդ հոդվածի 1-ին և 2-րդ մասերով, Արտակ Կարապետյանը, որը մեղադրվում է ՀՀ Քրեական օրենսգրքի 258-րդ հոդվածի 3-րդ մասի 1-ին և 2-րդ կետերով և 316-րդ հոդվածի 1-ին մասով, Սարգիս Գևորգյանը, Արեգ Գևորգյանը, Դավիթ Քիրամիջյանը, Սահակ Մուրադյանը, Վահագն Գևորգյանը, ովքեր մեղադրվում են ՀՀ Քրեական օրենսգրքի 258-րդ հոդվածի 3-րդ մասի 1-ին և 2-րդ կետերով:
Մեղադրյալները նախաքննության ընթացքում ցուցմունք են տվել ոստիկանության աշխատակիցների կողմից բռնությունների ենթարկվելու վերաբերյալ: Այդ իսկ պատճառով, քրեական գործի օբյեկտիվությունն ու բազմակողմանիությունն ապահովելու համար, գլխավոր դատախազի հանձնարարությամբ, քրեական գործն ուղարկվել է հատուկ քննչական ծառայություն:
