Փետրվարի 7-ի արտահերթ նախագահական ընտրություններից հետո, երբ Բաքվում փորձագիտական որոշ շրջանակներ ակնկալում էին ներքին բարեփոխումների եւ ազատականացման քայլերի, Ադրբեջանի կառավարությունը բոլորի համար անսպասելի եւս երեք ամսով երկարաձգեց հատուկ կարանտինային ռեժիմը, որ ենթադրում է ցամաքային փակ սահմաններ հարեւան բոլոր երկրների հետ: Իրավիճակը չփոխվեց նույնիսկ Վրաստանի վարչապետի հայտարարությունից հետո:
Մեկ ամիս անց՝ մարտի 5-ին պաշտոնական երկօրյա այցով Բաքու մեկնեց Ռուսաստանի վարչապետ Միշուստինը: Իլհամ Ալիեւի հետ նրա բանակցությունները տեւեցին ավելի քան երեք ժամ, որից հետո կողմերը հայտարարեցին, որ Հյուսիս-հարավ միջազգային տրանսպորտային միջանցքի հարցում սկզբունքային պայմանավորվածություն է ձեռք բերվել: Ադրբեջանական մամուլը գրեց, որ Միշուստինը Բաքվում հանդես է եկել որպես ՌԴ նախագահի հատուկ բանագնաց:
Մարտի 17-ին, երբ Ռուսաստանի ԿԸՀ-ն նախագահական ընտրությունների միայն նախնական տվյալներ էր հաղորդել, կայացավ Իլհամ Ալիեւի եւ Վլադիմիր Պուտինի հեռախոսազրույցը, որի ընթացքում հաստատվեց երկու երկրների հարաբերությունների՝ դաշնակցային, համագործակցության ռազմավարական բնույթը: Մի քանի ժամ անց Իլհամ Ալիեւն արդեն օկուպացված Ստեփանակերտում էր, որտեղ վառեց Նավրուզի տոնական խարույկը եւ հայտարարեց, որ այդ «կրակը վերջնականապես անջատողականությունից մաքրագործում է հրապարակը»:
Մեկ օր անց Բաքվում էր ՌԴ Քննչական կոմիտեի նախագահ Բաստրիկինը: Նա հանդիպեց Ադրբեջանի գլխավոր դատախազ Ալիեւի հետ, բանակցությունների արդյունքում կողմերն ստորագրեցին «հանցավորության դեմ պայքարում համագործակցության 2024-2026 թվականների Ծրագիր»: Այդ փաստաթուղթը հրապարակված չէ, որեւէ տեղեկություն չկա, թե ինչ կոնկերտ ինչ բնագավառներում է, որ Ռուսաստանի Քննչական կոմիտեն եւ Ադրբեջանի գլխավոր դատախազությունը պետք է համագործակցեն:
Բաստրիկինի Բաքու այցից երեք օր անց՝ մարտի 22-ին Մոսկվայի «Կրոկուս սիթի հոլում» տեղի ունեցավ ահաբեկչություն: 2009թ. կառուցված եւ 38 հազար քառակուսի մետր մակերեսով համալիրի սեփականատերն էթնիկ ադրբեջանցի, Իլհամ Ալիեւի խնամի Արազ Աղալարովն է: Ռուսաստանյան մամուլում տեղեկություն է հայտնվել, որ համալիրը «հիպոթեկային պայմանագրով գրավադրված է «Գազպրոմբանկում»՝ մինչեւ 2032 թվականը ժամկետով»: Իրականում ո՞վ է «Կրոկուս սիթի հոլի» սեփականատերը՝ հայտնի չէ:
Բաքվի իշխանամերձ մամուլը գրում է, որ ահաբեկչությունից հետո Իլհամ Ալիեւը զանգահարել է Պուտինին՝ ցավակցություն հայտնելու, իսկ Ռուսաստանի նախագահը «խոսել է ահաբեկչության դեմ համատեղ պայքարի մասին»: Ռուս-ադրբեջանական հարաբերություններում արմատական շրջադարձը կապվում է 2001թ. հունվարի 6-ին Վլադիմիր Պուտինի Բաքու այցի հետ, որի արդյունքում Ադրբեջանի կառավարությունը փակել է Իչկերիայի հանրապետության ներկայացուցչությունը, մոտ մեկ տասնյակ չեչեն դաշտային հրամանատարների ձերբակալել եւ արտահանձնել Ռուսասստանին, մյուսներին արտաքսել: Նույնիսկ նրանց, որ բուժում էին ստանում:
Ի՞նչ ընդհանուր «ընդհատակ,, եւ բիզնես կապեր ունեն Ռուսաստանի եւ Ադրբեջանի վերնախավը՝ բարդ հարց է: Անցյալ աշնանը կալանավորված տնտեսագետ, հանրային-քաղաքական գործիչ Իբադօղլուն Եվրախորհրդանին հղած նամակում վկայել է, որ Լոնդոնի ֆոնդային բիրժայում աշխատելու ընթացքում «բացահայտել է, որ Ադրբեջանը Եվրամիությանը ռուսաստանյան գազ է վաճառում»: Ըստ նրա՝ իր կալանավորման պատճառը դա է: Նույն օրը, երբ Ադրբեջանի արտգործնախարարությունը Միացյալ Նահանգներին եւ Եվրամիությանը մեղադրել է Հայաստանին միակողմանի օժանդակություն ցուցաբերելու եւ Հարավային Կովկասում «նոր բաժանարար գծեր եւ ազդեցության ոլորտներ ստեղծելու» մեջ, ՌԴ ԱԳՆ պաշտոնական ներկայացուցիչ Զախարովան վերստին խոսել է նախկինում եռակողմ ձեւաչափով ձեռք բերված «համաձայնությունների հիման վրա» հայ-ադրբեջանական կարգավորման մասին:
