Քրդական Fırat լրատվական գործակալության փոխանցմամբ՝ 2010 թվականի օգոստոսից ԱՄՆ ազգային հետախուզական կազմակերպության ղեկավար Ջեյմս Կլեպերն այցելելու է Թուրքիա և հանդիպում ունենալու Թուրքիայի ազգային հետախուզական կազմակերպության (MIT) ղեկավարության հետ։
Թուրքական Milliyet թերթի տվյալներով՝ Կլեպերն այս շաբաթվա սկզբին գաղտնի այցով ժամանելու է Անկարա։ Ակնկալվում է, որ իր թուրքական այցի շրջանակներում Կլեպերը քննարկելու է հետախուզական ոլորտում և Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) դեմ պայքարում համագործակցությանը, Մալաթիայի Քյուրեջիք վայրում ՆԱՏՕ-ի հակահրթիռային պաշտպանության համակարգի տեղակայմանը, ինչպես նաև Լիբիայի ու Սիրիայի հարցերին առնչվող խնդիրներ։
Հիշեցնենք, որ ներկայումս Թուրքիան պատրաստվում է ներխուժել Հյուսիսային Իրաք, ուր գտնվում են PKK-ի ճամբարները։ Թուրք-իսրայելական հարաբերությունների կտրուկ սրումից հետո Թուրքիան զրկվել է իր զինված ուժերն իսրայելական արտադրության Heron անօդաչու թռչող սարքերով համալրելու հնարավորությունից, որոնք շարունակ կիրառում էր քուրդ զինյալների դեմ։
Այդ նպատակով օրեր առաջ Թուրքիան Օբամայի վարչակազմից խնդրել է իրեն տրամադրել Predator («Գիշատիչ») տիպի անօդաչու հետախուզական ինքնաթիռներ։ Թուրքական կողմը չի մոռացել, որ մինչև տարեվերջ Իրաքում գտնվող ամերիկյան զորքերը պետք է ամբողջովին դուրս բերվեն այդ երկրից։
