Հարավային Օսիայի «խորհրդարանի նախագահ» Ալան Ալբորովը ՌԻԱ-Նովոստիին հարցազրույցում չի բացառել, որ վրացական նախկին ինքնավար մարզը կարող է միավորվել Ռուսաստանին: Նա ասել է, որ այդ հարցում Ցխինվալին Մոսկվայի հետ գործում է միասնաբար եւ եթե գան ընդհանուր մտքի, ապա դա կանեն: ՌԴ Դաշնային ժողովի վերին պալատի փոխխոսնակ Կոնստանտին Կոսաչեւը Ալբարովի հետ հանդիպմանը մտահոգություն է հայտնել Հարավային Օսիայի «խորհրդարանի» առանձին «պատգամավորների կեցվածքից»: Ըստ երեւույթին, Ցխինվալիում կան քաղաքական խմբեր եւ անհատներ, որ դեմ են տեղաշրջանը Ռուսաստանին «միավորելու» նախագծին:
Ռուս-վրացական դիվանագիտական հարաբերությունները 2008թ. «հնգօրյա պատերազմից» հետո խզված են: Կողմերի միջեւ գործում է այսպես կոչված Ժնեւի հարթակը: Վրաստանը վերջերս փոխել է Ռուսաստանի հետ գլխավոր բանագնացին, բայց վարչապետ Կոբախիձեն վստահեցրել է, որ «առկա խնդիրները չեն փոխվել»: Թբիլիսին ընտրել է իր տարածքները խաղաղ-բանակցային ճանապարհով վերադարձնելու ճանապարհը:
Հարավային Օսիայի «խորհրդարանի նախագահը» Ռուսաստանին միավորվելու թեման ակտուալացրել է Վրաստանի վարչապետի Բաքու այցից հետո եւ ՆԱՏՕ-ի գլխավոր քարտուղար Ստոլտենբերգի տարածաշրջանային ուղեւորության մեկնարկի նախօրեին: Ի՞նչ է կանխատեսում Ռուսաստանը, երբ Ուկրաինայում պատերազմի ահանգնացման փուլում հավակնում է վերջնականապես յուրացնել Վրաստանի միջազգայնորեն ճանաչված տարածքի մի մասը:
Դա բաց մարտահրավե՞ր է Արեւմուտքին: Վրաստանում իշխող կուսակցության այլընտրանքը նախկին նախագահ Սաակաշվիլիին եւ արմատական արեւմտամետ եւս մի քանի ուժեր են, իսկ խորհրդարանական ընտրություններին շատ քիչ ժամանակ է մնում: Ըստ էության, Վրաստանի ընտրությունը լինելու է Իվանիշվիլիի եւ Սաակաշվիլիի կամ չափավոր եւ արմատական արեւմտամետության, Ռուսաստանի հետ առկա պրագմատիկ հարաբերությունները պահպանելու կամ լիովին զատորոշվելու միջեւ:
Հրապարակայնացնել Հարավային Օսիան «խաղաղ կլանելու» հեռանկար, նշանակում է Վրաստանում սադրել ծավալուն հակառուսականություն եւ փաստացի բարդ վիճակ ստեղծել իշխող ուժի համար: Ռուսաստանը «հանձնու՞մ է» Իվանիշվիլիին, նրան ձեռնտու է ունենալ բացահայտ եվրաատլանտյան դաշինքին ինտերգրվող Վրաստանի հարեւանությու՞ն: Դա կարող է մի դեպքում լինել. եթե Ռուսաստանն ունի ամբողջական Վրաստանը ռազմական ուժով ներկալելու հեռագնա նախագծում:
Ռուս-վրացական ցանկացած դիմակայություն հղի է Հայաստանի շրջափակման սպառնալիքով: Վրաստանի վարչապետն անոնսավորել է, որ Բաքվում բանակցություններից մեկ շաբաթ անց կայցելի Հայաստան: Հարավային Օսիան «միավորելու» մասին Մոսկվայի բաց ուղերձը Երեւանին հղած ազդակ չէ՞: Իսկ ամենաինտրիգայինն այն է, թե ինչու՞ Աբխազիան Ռուսաստանին «միավորվելու» ցանկություն չի դրսեւորում: Հնարավո՞ր է, որ Ռուսաստանը կլանի Հարավային Օսիան եւ Աբխազիայում ռազմահենայականներ ունենալու գնով նախկին ինքնավարությունը «վերադարձնի» Վրաստանին: Վրաստանը Սեւծովյան-Կասպյան տարածաշրջանի «դուռն է»: Եւ «փակել» այն՝ կնշանակի ներկալել ամբողջ Հարավային Կովկասը: