Նիկոլ Փաշինյանը նախօրեին ներկայացնելով Պետական պահպանության ծառայության նորանշանակ ղեկավարին, հայտարարել է, որ ծառայությունն իր զարգացման նոր փուլ է մտել ԱԱԾ ենթակայությունից անցնելով վարչապետին ենթակա կարգավիճակի: Դա ինչպես հայտնի է տեղի ունեցավ օրենսդրական փոփոխությունների շնորհիվ:
Հատկանշական է այն, որ Փաշինյանը ծառայության նոր ղեկավարին ներկայացնելով, շեշտում է կառույցի՝ վարչապետին ենթակա լինելու կարգավիճակը: Նիկոլ Փաշինյանը փորձում է ձեւավորել թերեւս ոչ միայն այսպես ասած ներիշխպանական քաղաքական հակակշիռներ, այլ նաեւ հակակշիռներ հատուկ ծառայությունների եւ ուշային բլոկներում: Ըստ էության, ԱԱԾ-ն «մասնատվեց» երեք մասի՝ ԱԱԾ, Արտաքին հետախուզական ծառայություն եւ ՊՊԾ: Հակակշիռները Փաշինյանին անհրաժեշտ են իրավիճակի թե ներքին, թե ըստ ամենայնի այսպես ասած արտաքին-աշխարհաքաղաքական կառավարման համար:
Հայաստանը չունի բարդ, եւ ըստ էության առավել բարդացող իրավիճակում «մոնոլիտ» կառավարման ռեսուրս: Մյուս կողմից, Փաշինյանի համար խնդիրը հրատապ է, որովհետեւ 2018-ից հետո ձեւավորված իշխանությունն ակնհայտորեն ավտորիտար իշխանություն է եւ մեկ անձի շուրջ է՝ Նիկոլ Փաշինյան: Փաշինյանը մի կողմից չի կարող հրաժարվել իշխանության այդ բնույթից, որովհետեւ դա կթուլացնի անձնապես իր դիրքերը, մյուս կողմից ունի բեռի կառավարելի ապակենտրոնացման անհրաժեշտություն, քանի որ միանձնյա դիրքը լավ է ներքին հարցերում, սակայն չափազանց խոցելի է դառնում արտաքին միջավայրում, որտեղ մթնոլորտային ճնշումը աննախադեպ է եւ դրսեւորում է ուժգնանալու ակնհայտ միտումներ: