Հայաստանի ճարտարապետության ազգային թանգարան-ինստիտուտի ցուցասրահում, բազմաթիվ հյուրերի ներկայությամբ, այսօր բացվեց Հայաստանի Հանրապետության անկախության 20-ամյակին նվիրված ճարտարապետական աշխատանքների ցուցահանդես:
Ցուցահանդեսին բացման խոսքով հանդես եկավ ՀՀ քաղաքաշինության նախարար Վարդան Վարդանյանը, ով իր խոսքում մասնավորապես անդրադարձավ քաղաքաշինության ձեռքբերումներին` դպրոցների, մշակույթի օջախների, մանկական ու առողջապահական համալիրների կառուցում, սակայն նշեց, որ չի ցանկանում այնպիսի տպավորություն ստեղծել, թե ամեն ինչ գերազանց է, ունենք նաև «բացթողումներ ու թերացումներ՝ և՛ օբյեկտիվ, և՛ սուբյեկտիվ պատճառներով»:
«Ցուցահանդեսի նպատակն է ի ցույց դնել 20 տարում ստեղծածը: Ամեն ինչ չէ, որ հաջողվել է, սակայն համոզված եմ, որ ճիշտ ուղեցույց փնտրելու դեպքում մեր հետագա անցնելիք ճանապարհն ավելի հեշտ կլինի»,- ասաց Վ.Վարդանյանը:
Ցուցահանդեսին ներկայացվեցին վերջին 20 տարում ՀՀ-ում կառուցված, վերակառուցված, նախագծվող ու ծրագրային տարբեր փուլերում գտնվող քաղաքաշինական, բնակելի, հասարակական տարբեր շինությունների մանրակերտեր, գծագրեր:
Առավել հետաքրքիր աշխատանքներն էին մայրաքաղաքից դուրս, հատկապես Դիլիջանում ու Գորիսում կառուցված հյուրատներն ու շենք-շինությունները:
