Հայաստանի պաշտպանության նախարարությունը հայտնում է, որ փետրվարի 13-ի լուսադեմից ադրբեջանական զինուժը հրաձգային զինատեսակներից կրակ է բացել Ներքին Հանդի հայկական դիրքերի ուղղությամբ, ինչի հետեւանքով հայկական կողմն այս պահի տվյալով ունի երկու զոհ եւ վիրավորներ: Ադրբեջանը նախօրեին արդեն կարծես թե սկսել էր նախապատրաստել սադրանքը:
Համենայն դեպս, փետրվարի 12-ին Ադրբեջանը տեղեկություն էր տարածել, թե իբրեւ թե Կապան-Զանգելան ուղղությամբ հայկական սահմանապահ ստորաբաժանումները կրակ են արձակել եւ վիրավորել ադրբեջաննցի զինվորի: Հայկական կողմը արձագանքել էր արագ, հայտնելով, որ կիրականացնի հետաքննություն, եւ, եթե հայ զինծառայողները անհիմն կրակ են բացել, ապա կենթարկվեն պատասխանատվության: Ադրբեջանական կողմի նպատակը սակայն ակնհայտորեն եղել է սադրանքին նախորդող տեղեկատվական հնարքը, ինչի վկայությունն է այն, որ նույն օրը լուսադեմին սահմանային նույն գոտում ադրբեջանցիները իրականացրել են իրենց ծրագրած սադրանքը եւ սպանել երկու հայ զինծառայողի, վիրավորելով մի քանիսին:
Նախօրեին Բաքուն նաեւ Ադրբեջանում ԵՄ դեսպանին հրավիրել ԱԳՆ ու դժգոհություն էր հայտնել Հայաստանում ԵՄ դիտորդական առաքելությունից, հայտարարելով, թե այդ առաքելությունն իբրեւ թե խախտում է պայմանավորվածություններն ու «հակաադրբեջանական» է: Գործնականում, թե իբրեւ թե հայկական կողմից հրադադարի խախտման մասին տեղեկատվությունը, թե ԵՄ առաքելության առնչությամբ դժգոհությունը Ադրբեջանի համար եղել է ծրագրված ռազմական սադրանքի, պարզապես մարդասպանության եւ շանտաժի հերթական գործողության «տեղեկատվական նախապատրաստման» դրսեւորում:
Ըստ էության, հնարավոր է, որ Ադրբեջանը նախագահի արտահերթ ընտրությունն անցկացնելուց ընդամենը օրեր անց դիմելով այդօրինակ արկածախնդրության, հետապնդում է այսպես ասած «հող շոշափելու» նպատակ, ստուգել մի կողմից հայկական կողմին, մյուս կողմից՝ միջազգային դերակատարներին, շոշափել նրանց տրամադրվածությունը: Դա նշանակում է, որ, եթե միջազգային դերակատարները մտադիր չեն աչք փակել Ադրբեջանի ռազմական արկածախնդրության քաղաքականության ծավալման ռիսկերի վրա, պետք է տեղի ունեցած սադրանքը արժանացնեն ընդհուպ անհամաչափ խիստ գնահատականի:
