Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին սեպտեմբերի 9-ին այցելել է Ջավախք՝ հետևելու Փարվանայի հիդրոէլեկտրակայանի (ՀԷԿ) կառուցմանը, որի հզորությունը կազմելու է 78 մեգավատտ, իսկ տարեկան արտադրությունը՝ 425 միլիոն կվտ/ժամ։
Այնտեղ Սաակաշվիլին հայտարարել է, որ Ջավախքի շրջանը նախկինում Վրաստանի ամենալքված շրջանն էր, մինչդեռ այժմ սկսել է բոլորից արագ զարգանալ։ Ապա նա խոսել է ՀԷԿ-երի կառուցման ոլորտում Վրաստանի էներգետիկ մեծ նախագծերի մասին.
«Մեր էներգետիկ հիմնական աշխատանքները կիրականացվեն մինչև 2015 թվականը, մինչ այդ մենք կրկնապատկելու ենք հիդրոէներգետիկան։ Հաջորդ տարի ՀԷԿ-երի կառուցման գործընթացում ներգրավվելու է 12,800 մարդ։ Հաշվի առնելով, որ տվյալ ոլորտում ներկայումս աշխատում է 10-15,000 մարդ, նրանց ընդհանուր թիվը հասնելու է 30,000-ի։
Կարծում եմ, որ համաշխարհային շուկայում մեր նշանը պետք է դառնա ՀԷԿ-երի շինարարությունը։ Այս տեսանկյունից առաջիկա 15-20 տարում մենք մշտապես աշխատանք կունենանք։ Դրա հետ մեկտեղ, մենք պետք է սովորենք տուրբիններ արտադրել և դուրս գալ միջազգային շուկա։ Դա չափազանց կարևոր է։
Հիդրոէներգետիկայի տեսանկյունից մենք 1980-ական թվականներին գտնվում էինք համաշխարհային մակարդակի վրա։ Ինգուրին ամբողջությամբ կառուցել են վրացի շինարարները։ Այժմ մենք տեխնոլոգիական առումով որոշակի հետընթաց ենք ապրել, դրա համար էլ պետք է մեծ ուշադրություն հատկացնենք դրան։ Մեր «նոու-հաու»-ն պետք է լինի լավ շինարարությունը։
Մենք արդեն սովորել ենք կառուցել ամենաարագ տեմպերով, հնարավոր է՝ մենք անցնենք թուրքերին ու հասնենք չինացիներին։ Կատարելապես իրատեսական է այն նպատակը, որ համայն աշխարհում ամենաարագ ու որակյալ ձևով ՀԷԿ-եր կառուցելու են վրացիները։ Դրա համար մենք պետք է մարդկանց գործուղենք Ասիա, Աֆրիկա ու Եվրոպա։ Մենք հետամնաց, տնտեսապես անփորձ երկիր չենք, որ օտարերկրացին գա այստեղ և ինչ-որ բան կառուցի։
Մենք փորձ ենք կուտակում, և այժմ եզակի պահ է ստեղծվում այն նաև արտահանելու համար։ Այդ շինարարության ճանապարհով կանցնեն նոր պրոֆեսիոնալների սերունդներ։ Ստեղծվում է հիդրոտեխնիկայի լաբորատորիա, ուր հավաքվելու են բոլոր էներգետիկները։ Ի դեպ, այս տարի դիմորդների մեծ մասը նախընտրել է ինժեներային մասնագիտությունները։ Դեռևս հնարավոր է, որ գլխավոր մենեջերին հրավիրենք արտերկրից, սակայն ինժեներն ու տեխնիկն անպայմանորեն պետք է լինեն տեղական կադրեր»։
Հիշեցնենք, որ 2010 թվականին Վրաստանի բոլոր էլեկտրակայաններում արտադրվել է վերջին 7 տարիների համար ռեկորդային քանակությամբ էլեկտրաէներգիա՝ 10.1 միլիարդ կվտ/ժամ։ Ընդ որում՝ դրանից 9.3 միլիարդ կվտ/ժամն արտադրվել է ՀԷԿ-երում, իսկ 0.8 միլիարդ կվտ/ժամը՝ ՋԷԿ-երում։
Վրաստանն այժմ սկսել է էլեկտրաէներգիա մատակարարել Արևելյան Եվրոպային, որն իրականացվում է Թուրքիայի տարածքով։ Բացի այդ, Վրաստանը մտադիր է, 2014 թվականից սկսած, Հայաստանի տարածքով էլեկտրաէներգիա մատակարարել Իրանին։ Դրա համար էլ Վրաստանը զարկ է տալիս ՀԷԿ-երի կառուցմանը։
Լուսանկարը` Օլեգ – Սանդրո Պանֆիլովի
