Այս պահին «Զվարթնոց» օդանավակայանում տեղի է ունենում նոր ուղևորահամալիրի բացման հանդիսավոր արարողությունը, որին մասնակցում է նաև Սերժ Սարգսյանը:
Վերջինիս մասնակցությամբ ցանկացած միջոցառումը լուսաբանող լրագրողներին հավատարմագրում են ՀՀ նախագահի աշխատակազմի Հասարակայնության և տեղեկատվության միջոցների հետ կապերի վարչությունում:
Օդանավակայանի նոր ուղևորահամալիրի բացումը հրապարակային կարևոր միջոցառում է, և «Առաջին լրատվական»-ը 2 օր շարունակ փորձում էր թղթակիցներին հավատարմագրել՝ այն լուսաբանելու համար: Սակայն, անհասկանալի պատճառներով, հավատարմագրվել այդպես էլ չհաջողվեց. լրագրողների ցուցակները կազմող աշխատակցուհին (ոմն Նանա) նախ 2 անգամ հետաձգեց գրանցումը, պատճառաբանելով, թե դեռ չի սկսել կազմել ցուցակները և խնդրելով ավելի ուշ զանգահարել, իսկ արդեն հետագա զանգերը պարզապես անպատասխան էին մնում:
Այլ հեռախոսահամարներին արված զանգերին պատասխանող աշխատակիցները նշում էին, թե հավատարմագրելու իրավասություն ունի միայն տվյալ աշխատակցուհին:
Հարց է առաջանում՝ ի՞նչ ունի թաքցնելու Սերժ Սարգսյանը:
Ի դեպ, սա առաջին դեպքը չէ, որ նախագահականը խուսափում է աշխատել «Առաջին լրատվական»-ի հետ: Այսպես. օգոստոսի 26-ին մեր լրագրողներից մեկը Սերժ Սարգսյանի մամլո խոսնակին հարցում է ուղարկել, որին մինչ օրս որևէ պատասխան չի տրվել: