Թուրքիայի արտգործնախարար Հաքան Ֆիդանը հայտարարել է, որ Իսրայելի վարչապետ Բենիամին Նեթանյահուն Գազայի հատվածում գործողություն է իրականացնում, որպեսզի ամրապնդի սեփական քաղաքական դիրքերը:
Ֆիդանն այս մասին հայտարարել է ՄԱԿ-ի Անվտանգության խորհրդում Մերձավոր Արևելքում տիրող իրավիճակի վերաբերյալ բաց բանավեճի ընթացքում:
«Գազայում և դրանից դուրս շարունակվող պատերազմը չի կարող բերել ո՛չ խաղաղության, ո՛չ էլ կապիտուլյացիայի: Մենք կրում ենք պատմական պատասխանատվություն այս պատերազմի դադարեցման համար: Միջազգային հանրությունը դեռևս չի կարողանում դադարեցնել արյունահեղությունը Գազայում և Հորդանան գետի Արևմտյան ափին։ Գազան բացօթյա բանտ էր։ Այժմ այն դարձել է պատերազմական գոտի, որտեղ Իսրայելի վարչապետը կազմակերպում է ռազմական գործողություններ և սպանում քաղաքացիական անձանց՝ իր քաղաքական գոյատևումը երկարացնելու համար»,- ասել է Թուրքիայի արտգործնախարարը։
