Մի խումբ երիտասարդներ օրերս «Ֆեյսբուքում» հանդես եկան նոր նախաձեռնությամբ, որի նպատակը Արցախի խորհրդանիշ համարվող «Մենք ենք, մեր սարերը» արձանը փոշուց ու կեղտից մաքրելն է: Ի դեպ, հենց այս երիտասարդների օգնությամբ էր մաքրվել ու լվացվել Նոր Նորքում տեղակայված Հայկի արձանը:
«Արցախում գտնվելով ու տեսնելով արձանի վիճակը, որոշեցինք հանդես գալ այս նախաձեռնությամբ: Մենք չենք հետապնդում որևէ շահ, այլ ուզում ենք կեղտից ազատված տեսնել արձանը, որը սարսափելի վիճակում է` կավճով գրված են անհեթեթ բառեր, տուֆը սարսափելի կեղտոտ է»,- «Առաջին լրատվական»-ի հետ զրույցում ասաց «Մաքրենք տատիկ-պապիկի արձանը, ամոթ է» էջի հեղինակ, նախաձեռնող խմբի անդամ Կարեն Առուստամյանը`ընդգծելով, որ իրենք չեն ներկայացնում որևէ քաղաքական ուժ ու կազմակերպություն, իրենց նախաձեռնությունը զուտ քաղաքացիական է ու նպատակ ունի մաքուր տեսնել արձանը:
Նա տեղեկացրեց, որ ներկայումս շուրջ 160 մարդ է ցանկություն հայտնել մասնակցել սեպտեմբերի 25-ին Արցախ մեկնարկելիք ուղևորությանը, սակայն իրենք նախաձեռնել են մինչև 30 հոգանոց խմբով գնալ ԼՂՀ, որտեղ էլ նախաձեռնող խմբին կմիանան Ստեփանակերտի համալսարանի ուսանողները:
Նախաձեռնության անդամների առջև ծառացած հիմնական խնդիրը, Առուստամյանի խոսքով, հովանավորներ գտնելն է: Նա կոչ արեց օգնել նախաձեռնության անդամներին գոնե Արցախ հասնելու հարցում:
