«Դե Ֆակտո» մամուլի ակումբի այսօրվա հյուրերն էին Միջազգային Եվրոպական շարժման գլխավոր քարտուղար Դիոգո Պինտոն և ՀՀ Եվրոպական շարժման նախագահ Վիկտոր Ենգիբարյանը:
Վերջինս նշեց, որ հոկտեմբերի 20-21-ը Երևանում առաջին անգամ կկայանա Եվրոպական շարժման կոնգրեսը, որի թեման առնչվելու է Արևելյան գործընկերությանը:
Նախատեսվում է, որ կլինեն երեք աշխատանքային խմբեր, Կոնգրեսի բացումը տեղի կունենա Մատենդարանի նորակառույց շենքում, ողջույնի խոսքով հանդես կգան Սերժ Սարգսյանը, Եվրամիության արտաքին քաղաքականության ղեկավար Քեթրին Էշթոնը, Գագիկ Ծառուկյանը, Եվրոպական խորհրդարանից ներկայացուցիչներ, և կընդունվի Երևանյան հռչակագիր:
Դիոգո Պինտոն նշեց, որ իր այցը նախապատրաստական բնույթ է կրում, ինչպես նաև քաղաքական` Կոնգրեսի ապագայի համար: Նա նշեց, որ քաղաքացիական հասարակության դերի կարևորումն է պատճառը, որ Կոնգրեսը հատկապես Հայաստանում է անցկացվում:
«Կոնգրեսը քաղաքական գործընթացներում քաղաքացիական հասարակությանը ներգրավելու միջոց է»,- նշեց Պինտոն` հավելելով, որ Կոնգրեսի հաջողությունը երկու բանից է կախված` քաղաքացիական հասարակության ակտիվությունից և քաղաքացիական հասարակության հետ քաղաքական իշխանությունների թափանցիկ կապից: Առաջիկա Կոնգրեսը Արևելյան գործընկերության երկրների համագործակցության գործընթաց է: