Ռուսաստանն ու Ուկրաինան մուտք գործեցին 2024 թվական՝ սաստկացնելով գրոհները։ Սակայն հակամարտության հետ կապված ոչ պակաս կարևոր զարգացումներ են օվկիանոսից անդին՝ Վաշինգտոնում, ուր հանրապետականները չեն ցանկանում բավարարել Կիևին օգնություն հատկացնելու նախագահ Ջո Բայդենի վարչակազմի առաջարկը։
Ուկրաինայում այս տարին ևս սկսվեց մռայլ լուրերով․ շատ ժամանակ չի մնացել, երբ կլրանա Կիևի դեմ Կրեմլի ագրեսիվ պատերազմի երկրորդ տարելիցը, և անցնող օրերին ռուսական ուժերի ինտենսիվ գրոհների ներքո էին հայտնվել Ուկրաինայի մայրաքաղաքն ու մեծությամբ երկրորդ քաղաքը՝ Խարկովը։
Ուկրաինական կողմը հակադարձեց՝ հարվածներ հասցնելով Ռուսաստանի սահմանային Բելգորոդի նահանգին:
Սակայն ոչ պակաս կարևոր զարգացումներ են օվկիանոսից անդին՝ Վաշինգտոնում, ուր հանրապետականները տակավին դեմ են նախագահ Ջո Բայդենի վարչակազմի առաջարկին՝ շուրջ 64 միլիարդ դոլարի ռազմական և այլ կարգի աջակցություն ցուցաբերել Ուկրաինային: Հանրապետականները պնդում են՝ իրենց մոտ չեն փարատվել մտահոգությունները, թե արդյոք Վաշինգտոնը կարող է իրեն թույլ տալ նման կարգի աջակցություն ցուցաբերել։ Սպիտակ տնից հակադարձում են՝ այլևս չի կարելի հապաղել:
«Թեև նախորդ օրերին մամուլի որոշ հրապարակումներից տեղեկացա, թե պարոն Պուտինը պատրաստ է բանակցել, [սակայն] նա իրեն չի պահում այնպիսի մարդու նման, ով պատրաստ է բանակցել: Նա անում է ամեն ինչ, որպեսզի նեղը գցի ուկրաինացիներին։ Ուստի, անչափ կարևոր է, որ նախագահ [Բայդենի] կողմից առաջարկված [Կիևին] լրացուցիչ ֆինանսավորելու խնդրանքը բավարարվի»,- ասում է ԱՄՆ Ազգային անվտանգության խորհրդի խոսնակ Ջոն Քիրբին։
Ռազմական փորձագետները փակուղային են գնահատում իրավիճակը մարտադաշտում՝ նշելով, որ ռեսուրսներով Ռուսաստանին զիջող Ուկրաինան մեծ վճռականություն է ցուցաբերում Կրեմլի դեմ պայքարում:
«Առանց ԱՄՆ օգնության Ուկրաինայի ռազմական հնարավորությունները կնվազեն, և նրանք չեն կարողանա դիմակայել ռուսական հարձակումներին: Հավանաբար, այժմ էլ նրանք՝ [ուկրաինացիները] չունեն բավականաչափ զինամթերք և պաշարներ՝ հակահարձակման համար: Մի երկու ամսից նույնիսկ հակագրոհներ իրականացնելը նրանց համար դժվար կլինի: Կարծում եմ, մինչև գարնան վերջը նրանց համար դժվար կլինի հետ պահել ռուսներին: Ուստի, [ամերիկյան] ռազմական օգնության
հատկացումը վճռորոշ է հակամարտության հետագա ընթացքի համար»,- նշում է Ռազմավարական և միջազգային հետազոտությունների կենտրոնի ներկայացուցիչ Մարկ Կանչիանը:
Ռուսաստանի նախագահ Վլադիմիր Պուտինը վերջերս հրապարակավ խոստացավ շարունակել պատերազմը։
«Շարունակելու ենք այդ անել։ Թերևս, նկատել եք, որ [հենց] հաջորդ օրը նման հարվածներ հասցվեցին, և այսօր էլ ենք հասցնում ու վաղն էլ կհասցնենք»,- ասում է Ռուսաստանի նախագահը։
Ուկրաինական պատերազմը շարունակում է մնալ աշխարհի ուշադրության կենտրոնում։ Օրինակ, կաթոլիկ եկեղեցու հովվապետը առիթը բաց չի թողնում համաշխարհային առաջնորդների ուշադրությունը հրավիրել Եվրոպայի արևելքում ծավալվող ռազմական գործողությունների և մարդկաց տառապանքների վրա:
«Եվ եկեք չմոռանանք պատերազմում գտնվող մարդկանց։ Պատերազմը հիմարություն է։ Պատերազմը միշտ պարտություն է։ Միշտ պարտություն։ Եկեք աղոթենք»,- նշում է Հռոմի Ֆրանցիսկոս պապը:
Ցավոք, աղոթքները դժվար թե իրավիճակ փոխեն, իսկ այն, ինչ Ուկրաինան է պահանջում, զենքն է:
