Բաղդադի արևելքում գտնվող իրաքյան աշխարհազորի կենտրոնակայանի վրա հարձակման հետևանքով առնվազն 3 զինյալ է զոհվել, ևս 6-ը՝ վիրավորվել։ Այս մասին հաղորդում է Reuters գործակալությունը՝ վկայակոչելով անվտանգության ուժերում իր աղբյուրներին։
Ըստ ոստիկանության աղբյուրների՝ առնվազն 2 հրթիռ է հարվածել շենքին, որն օգտագործվում է իրաքյան ալ-Նուջաբա աշխարհազորային խմբի կողմից։
Խմբի խոսնակը հարձակման մեջ մեղադրել է ԱՄՆ-ին։ Իսկ Իրաքի անվտանգության աղբյուրները հայտնել են, որ չգիտեն՝ ով է հարձակման պատասխանատուն։
Դեկտեմբերին Իրանի աջակցությունը վայելող աշխարհազորայինների հարձակումից հետո ԱՄՆ-ն Իրաքում պատասխան հարվածներ էր հասցրել զինյալների դիրքերին։ Զինյալների հարձակման հետևանքով վիրավորվել էր ամերիկացի 3 զինծառայող, որոնցից մեկը՝ ծայրահեղ ծանր։
Հոկտեմբերին Իսրայելի և պաղեստինյան ՀԱՄԱՍ արմատական շարժման միջև ռազմական գործողությունների մեկնարկից ի վեր Իրաքում և Սիրիայում տեղակայված ամերիկյան ուժերն արդեն շուրջ 100 հարձակման են ենթարկվել հրթիռներով և ԱԹՍ-ներով։
