Ոստիկանության արդեն նախկին փոխգնդապետ Ռազմիկ Արթենյանը և նրա երկու որդիները`Սրապիոն և Սամվել Արթենյանները, արդեն ութ ամիս է ձերբակալված են: Ինչպես Արթենյանների ընտանիքի անդամներն են պնդում, այս ամենը կազմակերպվել է Արարատի մարզի ոստիկանապետ Մարգար Մեքոնյանի հրամանով, որի մեջ անմիջականորեն ներգրավված են եղել Վեդիի քաղաքապետ Վարուժան Բարսեղյանը և նրա եղբայրը`Արտակ Բարսեղյանը, ով ՀՀ վճռաբեկ դատարանի դատավորներից է: Արդյունքում`Վեդիի ոստիկանները կռվի մեջ են ներգրավել Ռազմիկ Արթենյանի ընտանիքին և քրեական գործ հարուցելով`զրկել պաշտոններից:
Ռազմիկ Արթենյանի կնոջ` Մարիամ Արթենյանի խոսքերով`այս ամենը վաղուց մշակված սցենար է եղել, որը գրվել և մշակվել է Արտակ Բարսեղյանի և Վարուժան Բարսեղյանի կողմից, իսկ Արթենյանների նկատմամբ թշնամանքը գալիս է դեռ 2007-ից, երբ նրանք գնել են իրենց խանութի կողքի տարածքը , որը պատկանում էր Բարսեղյան եղբայրներին: «Այնուհետև պարզվում է` մեր տարածքից որոշ մասեր ապօրինի վաճառել են սրան-նրան, մենք դատարան մտանք և շահեցինք դատը»,-պատմում է Մարիամ Արթենյանը: Բարսեղյան եղբայրները Արթենյանների ընտանիքին պատկանող շինության համասեփականատեր են: Մարիամ Արթենյանը պատմում է, որ Վճռաբեկ դատարանի դատավոր Արտակ Բարսեղյանն այս ընթացքում իր ամուսնուն անընդհատ ստիպել, պարտադրել է Արթենյաններին պատկանող տարածքից հատված տալ իրեն, գումար տալ` շինարարական աշխատանքներ իրականացնելու համար: « Իրենք ի սկզբանե նպատակ ունեին ոչնչացնել Արթենյան ընտանիքը, նախադեպ չունեցող դեպք է, երբ մեկ ընտանիքից կալանավորում են միաժամանակ երեք հոգու»,- ասում է Մարիամ Արթենյանը:
Իսկ միջադեպը, որի արդյունքում կալանավորել են հորը և երկու որդիներին, տեղի է ունեցել հունվարի 21-ին, երբ տղաները ոստիկանության շենքի դիմացի սրճարանում որոշել են ուրախանալ, ավտոմեքենաների շարժ է եղել. «Պատճառաբանում են, որ դեպքի վայրում ոստիկանները հայտնվել են վիճաբանության պատճառով, սակայն դա իրականությանը չի համապատասխանում, տղաները իրենց համար ուրախացել են, հետո նստել մեքենա, որից հետո ոստիկանները կտրել են ճանապարհը, ծեծի ենթարկել ու բաժին տարել»,- պատմում է Մարիամ Արթենյանը: Ռազմիկ Արթենյանն էլ գնացել է տեսնի ինչ է կատարվում, արդյունքում` ձերբակալել են նաև նրան:
Մ. Արթենյանը պատմում է, որ մարզային վարչության պետ Մարգար Մելքոնյանը կանչել է տվել Ռազմիկ Արթենյանին և Սևան Քորչարյանի աշխատասենյակում , մի քանի մարդկանց ներկայությամբ ասել է. «ցեղդ վառելու եմ` մեծից մինչև փոքր և մոխրացնեմ», իսկ Սևան Քոչարյանին հրամայել է` հավաքել տղաներին, որ ցուցմունք տան, որ ոչ միայն համակարգից ազատեն ամուսնուն և որդուն, այլ նաև դատեն:
Այս ընթացքում Մարիամ Արթենյանը դիմել է ոստիկանապետին, նախագահին, գլխավոր դատախազին, բայց որևէ մեկը չի արձագանքել:
Արթենյանների ընտանիքը այս միջադեպի անմիջական «թիկունք» է համարում մարզային վարչության պետ Մարգար Մելքոնյանին, ով սպառնացել է իրենց «վառել»:
Մարիամ Արթենյանը պահանջում է արդարացի լուծում, այլապես գնալու է մինչև Եվրոպական դատարան:
Վեդիի քաղաքապետ Վարուժան Բարսեղյանից հետաքրքրվեցինք` ի՞նչ կոնֆլիկտ ունի Արթենյանների ընտանիքի հետ և ի՞նչ կապ ունի այս պատմության հետ: «Ես բացարձակապես Արթենյանների ընտանիքի հետ կոնֆլիկտ չեմ ունեցել, եղել է աշխատանքային խնդիր` իրենց և հարևան շինության հետ կապված, ընդամենը մասնագիտական լուծում է տրվել սրանից հինգ տարի առաջ և օրենքով, կարգով հարթվել է: Իմ քաղաքապետ աշխատած ժամանակահատվածում որևէ խնդիր չի եղել նրան հետ: Ոչ մի կոնֆլիկտ, տհաճ վիճաբանություն, բացարձակապես նման բան չի եղել»,- պատասխանեց Բարսեղյանը:
Իսկ ինչ վերաբերում է Արտակ Բարսեղյանի հետ հարաբերություններին, Վարուժան Բասեղյանն ասում է, որ եղբոր հետ էլ կոոֆլիկտ չի եղել, որ իր եղբայրը Ռազմիկ Արթենյանի եղբոր` Գառնիկ Արթենյանի հետ առ այսօր շատ մոտ ընկերներ են: «Ինքը, լինելով դատավոր, Գառնիկն էլ սովորական քաղաքացի, ընկերություն են արել, մինչև այսօր էլ անում են: Դրա մեջ, ինձ թվում է, վատ բան չկա: Թեկուզ, ասենք, ինչ-որ տեղ մեղավորություն էլ ունենան, ամեն դեպքում ցավալի է, ինձ համար էլ ցանկալի չէ, հաճելի չէ, որ մի ընտանիքից երեք հոգի ձերբակալված են»,- ասաց Վեդիի քաղաքապետը:
