Երուսաղեմի հայոց Պատրիարքարանը հայտնում է, որ չեղարկել է 2021 թվականի հուլլիսի պայմանագիրը, որով Xana Gardens Ltd-ին 99 տարով վարձակալության էր տրվում Պատրիարքարանին պատկանող «Կովերի պարտեզ» տարածքը: Վարձակալության այդ պայմանագիրը դարձել էր մեծ աղմուկի պատճառ: Xana Gardens Ltd ընկերության սեփականատերը Ավստրալիացի հրեա Ռուբինշտեյնն է, որն ըստ Պատրիարքարանի արել է բավականին շահավետ առաջարկ, թեեւ եղել են նաեւ այլ առաջարկներ: «Կովերի պարտեզ» կալվածքը գտնվում էր Երուսաղեմի հայկական թաղամասի հարավարեւմտյան հատվածում՝ հրեաների համար սրբազան համարվող Սիոն լեռան վրա: Վարձակալության գործարքը բացի զուտ այսպես ասած ներեկեղեցական, ներհայկական շրջանակում հարցերից՝ կապված ֆինանսական եւ այլ բաղադրիչների թափանցիկության հետ, պարունակում էր նաեւ ավելի լայն խնդիրներ՝ հրեա-պաղեստինյան հարաբերության շրջանակով:
Հայտնի է շատ վաղուց, որ Երուսաղեմում հրեական ներկայության որեւէ ընդլայնում խիստ դժգոհություն է առաջացնում պաղեստինցիների շրջանում: Հայկական Պատրիարքությանը պատկանող կալվածքը հրեա գործարարին գրեթե մեկ դարով վարձակալության հանձնելու գործարքը բնականաբար չէր լինելու բացառություն: Խնդրի մասին է վկայում այն, որ 2021 թվականի դեկտեմբերին պաղեստինյան պատվիրակությունը հարցը քննարկել էր Մայր Աթոռ Սուրբ Էջմիածնում՝ Ամենայն Հայոց Կաթողիկոսի հետ: 2022 թվականին խնդրին արձագանքել էր Գերագույն Հոգեւոր Խորհուրդը, կոչ անելով Պատրիարքարանին վերանայել գործարքը:
Եվ ահա, 2023 թվականի հոկտեմբերի 23-ին Երուսաղեմի հայկական Պատրիարքարանը հայտնում է, որ գործարքը չեղարկվել է: Ի դեպ, հատկանշական է, որ այդ մասին տեղեկություն տարածվում է Մայր Աթոռ Սուրբ Էջմիածնում Գերագույն Հոգեւոր Խորհրդի աշխատանքի մեկնարկից մեկ օր անց: Խորհուրդը իր հերթական հավաքը գումարել է հոկտեմբերի 31-ին եւ աշխատելու է չորս օր, իսկ օրակարգում լինելու է Արցախից տեղահանվածների օգնության հարցը: Սակայն, առավել ուշագրավն այն է, որ Երուսաղեմի Պատրիարքարանը հրեա գործարարի հետ գործարքը չեղարկելու մասին հայտնում է Իսրայելում պատերազմի ֆոնին, որ բռնկվեց ՀԱՄԱՍ-ի հարձակումով եւ ներկայումս ընթանում է թե ռազմական, թե քաղաքական-դիվանագիտական խիստ բազմաշերտ տրամաբանությամբ:
