Մամուլում տեղեկություն է տարածվել, որ ԼՂՀ լուծարման հրամանագիր ստորագրելուց առաջ Սամվել Շահրամանյանը ԱԱԾ տնօրեն Արմեն Աբազյանի միջոցով կապ է հաստատել վարչապետ Նիկոլ Փաշինյանի հետ: Բաքվի լրատվամիջոցները շատ արագ արձագանքել են եւ հավելել, որ Փաշինյանը Շահրամյանին կոչ է արել «անհապաղ կատարել Ադրբեջանի բոլոր պահանջները»: Արցախի նախագահի աշխատակազմից եւ տեղեկատվական շտաբից մեկնաբանություն առ այս պահը չկա եւ հազիվ թե լինի: Սամվել Շահրամանյանը եւ նրա մերձավոր շրջապատը, երեւում է, ընտրել են տեղեկատվական որոշակի արտահոսքերի միջոցով հանրությունը ներկայացնել իրենց ասելիքը: Դա այլ թեմա է:
Սամվել Շահրամանյանը Արցախի նախագահ է ընտրվել սեպտեմբերի 9-ին: Նախընտրական ելույթում նա հայտարարել է, որ Արցախը կունենա կարգավիճակ եւ Հայաստանի հետ ցամաքային անխափան կապ: Շահրամանյանը մարտի 4-ին Անվտանգության խորհրդի քարտուղարի կարգավիճակով ՌԴ խաղաղապահ զորախմբի հրամանատարության զորակայանում հանդիպել է Ադրբեջանի նախագահի կողմից բանակցություններում ներկայացուցիչ նշանակված՝ Միլլի մեջլիսի պատգամավոր Ռամին Մամեդովի հետ: Ի՞նչ հարցեր են քննարկվել այդ օրը: Արցախի Անվտանգության խորհրդի անունից տարածված տեղեկատվության համաձայն՝ երբ ադրբեջանական կողմը փորձել է քաղաքական խնդիրներ բերել օրակարգ, Արցախի պատվիրակությունը, ինչպես ասում են, բանակցությունների սեղանը լքել է:
Արցախի լիակատար պաշարման, իրավիճակի ծայրահեղ սրման պայմաններում Սամվել Շահրամանյանը ի՞նչ երաշխիքներ է ունեցել, երբ հայտարարել է կարգավիճակի եւ Հայաստանի հետ ցամաքային անխափան կապի հասնելու՝ իր հնարավորության մասին: Հաջորդ օրը նա երդմամբ ստանձնել է Արցախի նախագահի պաշտոնը: Այստեղ չափազանց կարեւոր է մի հանգամանք. եթե ԼՂՀ լուծարման հրամանագիր ստորագրելուց առաջ նա կապ է հաստատել Հայաստանի վարչապետի հետ, ապա հարց է առաջանում՝ իսկ Նիկոլ Փաշինյանի հետ նա քննարկե՞լ է Արայիկ Հարությունյանի հրաժարականից հետո Արցախի նախագահի պաշտոնն ստանձնելու հարցը: Այսինքն, նա Հայաստանի վարչապետի կողմի՞ց է երաշխիք ստացել, որ նախընտրական ելույթում կարող է հավաստիացնել, որ Արցախը կարգավիճակ կունենա, իսկ Լաչինի միջանցքը կգործի նոյեմբերի 9-ի եռակողմ Հայտարարությամբ սահմանված ռեժիմով:
Դատելով Սամվել Շահրամանյանի կողմից Արցախի նախագահի պաշտոնն ստանձնելուն հաջորդած հայաստանյան քաղաքական հայտնի շրջանակների արձագանքներից՝ Հայաստանի վարչապետը Ստեփանակերտում իրականացված իշխանափոխության հետ որեւէ առնչություն չի ունեցել: Պետք է հիշել, թե ընդդիմությունը որքան եռանդուն էր զարգացնում Շահրամանյանին Փաշինյանի կողմից շնորհավորական ուղերձ չհղելու թեման: Տպավորություն էր ստեղծվում, որ Շահրամանյանի ընտրությամբ Արցախի հարցը մտնում է հայանպաստ կարգավորման հուն, իսկ Հայաստանի վարչապետը չի միանում այդ նպատակի իրացմանը:
Հաջորդած իրադարձությունները հիշեցնելու անհրաժեշտություն չկա, բայց արժե ընդգծել, որ սեպտեմբերի 8-ին Արցախի Ազգային ժողովում կայացել է քաղաքական ուժերի առաջնորդների հետ Սամվել Շահրամանյանի հանդիպումը, որի ընթացքում բացահայտվել է, որ ՌԴ խաղաղապահ զորախմբի հրամանատարության միջոցով Բաքուն վերջնագիր է ներկայացրել. եթե նախագահի ընտրություններ տեղի ունենան, ապա կհետեւի «հատուկ ռազմագործողությունը»: Այդ մասին Սամվել Շահրամանյանը, լինելով Անվտանգության խորհրդի քարտուղար, Հայաստանի իր պաշտոնակցին իրազեկե՞լ է: Թե չէ ստացվում է, որ իշխանափոխություն իրականացնելիս, Արցախի կարգավիճակի եւ Լաչինի միջանցքի ապաշրջափակման եւ անխոչընդոտ վերագործարկման խոստումներ տալիս ապավինել են բոլորովին այլ ուժի երաշխիքներն, իսկ ԼՂՀ լուծարման հրամանագիր ստորագրելուց առաջ խորհրդակցել Հայաստանի վարչապետի՞ հետ:
Եւ առհասարակ, ի՞նչ իմաստ ունի թեմայի վերաարծարծումը, եթե Սամվել Շահրամանյանը հայտարարել է, որ Արցախը լուծարված չէ, այդ հրամանագրի հետ կապված իրավական խնդիրներ կան: Ինչ-որ բան, ամենայն հավանականությամբ, այնպես չի ստացվում: Որոշ շրջանակներ չեն թաքցնում, որ սպասելիքները բոլորովին այլ էին՝ արցախցիները կգան եւ Նիկոլ Փաշինյանի կյանքը կվերածեն դժոխքի: Իսկ նրանք, ընդհակառակը, Երեւանում Արցախի մշտական ներկայացուցչության նստավայր են գնում եւ Սամվել Շահրամանյանին ներկայացնում իրենց խնդիրները, լուծումներ առաջարկում:
Հետեւում է, որ խմորվում է արցախցիների սոցիալական բողոքը քաղաքականի վերածելու եւ ցանկալի ակցիաները դեպի Հայաստանի կառավարություն ուղղորդելու քաղաքական օրակարգ: Ինչպե՞ս խթանել այն: Ահա այդ ձեւով՝ Սամվել Շահրամանյանը կապվել է Նիկոլ Փաշինյանի հետ, ստացել նրա հրահանգը եւ ստիպված ստորագրել Արցախի պետականությունը լուծարելու հրամանագիր: «Գնացեք եւ Նիկոլ Փաշինյանից ոչ միայն սոցիալ-կենցաղային ապահովություն, այլեւ Արցախի պետականության վերականգնում պահանջեք»- սա է տեղեկատվական արտահոսքի քարոզչական նպատակը, ինչին մեծ հաճույքով միանում է Բաքվի մամուլը: Ալիեւին պետք է տապալել բանակցությունները, բայց՝ հայկական կողմի ձեռքով: Բայց արդյոք հայկակա՞ն է այն ձեռքը, որ Երեւանում փորձում է արցախցիների միջոցով Նիկոլ Փաշինյանի համար դժոխք ստեղծել:
