Մոսկվայում կայացած մամլո ասուլիսի ժամանակ Ռուսաստանի ԶՈւ գլխավոր շտաբի պետ Նիկոլայ Մակարովն անդրադարձել է մի շարք հարցերի, որոնց թվում է եղել նաև արաբական հեղափոխությունների հարցը: Նրա կարծիքով՝ նման զարգացումներ չի կարելի բացառել նաև այլ երկրներում, այդ թվում` Կենտրոնական Ասիայում: Նա նշել է, որ Ռուսաստանը պետք է պատրաստ լինի նման զարգացումներին:
«Զարգացումները, որ տեղի են ունենում Հյուսիսային Աֆրիկայում և Մերձավոր Արևելքում, քիչ կանխատեսելի էին: Ի՞նչ կլինի հետագայում: Իչպիսի՞ն կլինի ղեկավարությունը: Դա պետք է ազդակ լինի այլ պետությունների համար»,- ասել է Մակարովը: «Մենք նմանատիպ հարցեր ունենք Կենտրոնական Ասիայում: Մենք պետք է ամեն ինչի պատրաստ լինենք: Այդ պատճառով դրան պատրաստվում ենք զորավարժությունների ժամանակ»,- հավելել է նա:
Մակարովն անդրադարձել է նաև անցած շաբաթ վարչապետ Պուտինին ներկայացված և նրա կողմից գովաբանված T-90C տանկին: Գլխավոր շտաբի պետն ասել է, որ այն միայն մասամբ է համապատասխանում ժամանակակից պահանջներին: Նա ասել է, որ ամեն ինչ այնքան հուսադրող չէ, որքան փորձում են ներկայացնել: Այս մասին հաղորդում է Interfax գործակալությունը:
Գլխավոր շտաբի պետը խոսել է նաև Արևմուտքից զենքի գնման հնարավորությունների մասին` նշելով, որ մասնավորապես գնվելու են ֆրանսիական հաուբիցներ, որոնք ավելի մոբիլ են և արագ, քան ռուսական տարբերակները:
