Ադրբեջանական APA լրատվական գործակալությանը տված հարցազրույցում Շվեդիայի արտգործնախարար Կառլ Բիլդտը հայտարարել է, որ ղարաբաղյան հակամարտությունը լուրջ մտահոգություն է առաջացնում ոչ միայն հակամարտության մեջ ներգրավված երկրներում, այլև՝ ողջ տարածաշրջանում ու միջազգային հանրության մոտ.
«Մենք պետք է խրախուսենք Հայաստանին ու Ադրբեջանին՝ հակամարտության խաղաղ կարգավորման ուղիների փնտրման համար։ Այդ պլանում Շվեդիան աջակցում է ԵԱՀԿ Մինսկի խմբի ջանքերին։ Խաղաղությունը կարող է ձեռք բերվել միայն բանակցությունների միջոցով։
Երկու կողմերն էլ պետք է զերծ մնան ագրեսիվ հռետորիկայից և դրա փոխարեն՝ իրենց բնակչության շրջանում ստեղծեն խաղաղության հիմք։ ԵՄ-ը պետք է աջակցի գործընթացին և տարածաշրջանի բնակչությանը ցույց տա, որ խաղաղ ճանապարհով կարելի է հասնել շատ առավելությունների»։
Խոսելով «Արևելյան գործընկերության» մասին՝ Կառլ Բիլդտը նկատել է, որ դրա հիմնական նպատակը եվրաինտեգրումն է. ««Արևելյան գործընկերությունը» նպաստել է արևելա-եվրոպական երկրների վրա ԵՄ անդամ 27 երկրների ուշադրության կոնցենտրացիային։ Այն արևելյան գործընկեր-երկրներին դրեց եվրոպական օրակարգի առաջին տեղում։
Այս ծրագրի շնորհիվ դրանում ներառված երկրներին առաջարկվում է ԵՄ-ին լայն քաղաքական ու տնտեսական ինտեգրացիա։ Ի պատասխան՝ այդ երկրները պետք է պահպանեն այն արժեքները, որոնք ընկած են եվրոպական համագործակցության հիմքում և առաջընթաց գրանցեն ներքին ինտեգրացիայի հարցերում»։
Հիշեցնենք, որ ԵՄ կողմից ստեղծված «Արևելյան գործընկերություն» նախագիծը միտված է նրան, որ Հայաստանը, Ադրբեջանը, Վրաստանը, Մոլդովան, Բելառուսը և Ուկրաինան է՛լ ավելի մերձենան ԵՄ-ին:
Թեև այն չի ենթադրում անդամակցություն ԵՄ-ին, այնուամենայնիվ, նախատեսում է քաղաքական ու տնտեսական մերձեցում: Այս ծրագրի մեկնարկը տրվել է 2009 թվականի մայիսի 7-ին՝ Պրահայում կայացած ԵՄ գագաթնաժողովում: