Ուկրաինայի նախագահ Վլադիմիր Զելենսկին հայտարարել է, որ պատրաստ է առաջադրել իր թեկնածությունը նախագահական հաջորդ ընտրություններին մասնակցելու համար, եթե դրանք անցկացվեն պատերազմի պայմաններում։ Այս մասին Զելենսկին հայտնել է պորտուգալական հանրային RTP հեռուստաընկերությանը հարցազրույցում։
«2024 թվականին, եթե պատերազմը շարունակվի, եթե ընտրություններ անցկացվեն, ես երբեք չեմ լքի իմ պետությունը։ Քանի որ ես Սահմանադրության երաշխավորն եմ, ես ցանկացած պարագայում պաշտպանում եմ այն», – ասել է նա։
2019 թվականի ընտրություններից առաջ Զելենսկին խոստացել էր, որ չի առաջադրվելու երկրորդ ժամկետով պաշտոնավարելու համար։
Սահմանադրության համաձայն՝ Ուկրաինայում հաջորդ խորհրդարանական ընտրությունները պետք է անցկացվեին 2023 թվականի աշնանը, իսկ նախագահականը՝ 2024 թվականի մարտին, սակայն Ուկրաինայի օրենսդրությունն ու Սահմանադրությունն արգելում են ընտրություններ անցկացնել ռազմական դրության պայմաններում։
Ինչպես նշում է BBC-ի ռուսական ծառայությունը, Ուկրաինայի արևմտյան դաշնակիցները բազմիցս ակնարկել են, որ կցանկանային, որ ընտրություններն անցկացվեն՝ չնայած պատերազմին։
Զելենսկին վերջերս տված հարցազրույցում ասել էր, որ ընտրությունների անցկացման համար անհրաժեշտ է առաջին հերթին փոփոխություններ կատարել օրենսդրության մեջ, բացի այդ, կպահանջվի նաև լրացուցիչ ֆինանսավորում։
Նրա խոսքով՝ շատ կարևոր է լուծել անվտանգության խնդիրը, բացի այդ, արևմտյան երկրները պետք է օգնեն կազմակերպել միլիոնավոր փախստականների ընտրությունները եվրոպական և այլ երկրներում։
