Football-rankings.info կայքը տեղեկացնում է, որ սեպտեմբերի 21-ին ՖԻՖԱ-ն կհրապարակի հավաքականների նոր վարկանիշային աղյուսակը, համաձայն որի՝ Հայաստանի ընտրանին կբարձրանա 27 հորիզոնականով, կզբաղեցնի 44-րդ տեղը և պատմության մեջ առաջին անգամ տեղ կգտնի լավագույն 50-յակում: Մինչ այս Հայաստանի հավաքականն իր լավագույն արդյունքը ցուցադրել էր 2010 թ. նոյեմբերին` 59-րդ հորիզոնական:
Միայն մեկ թիմ է Հայաստանի հավաքականից մեծ թռիչք կատարել. Էստոնիայի ընտրանին իր դիրքը բարելավել է 28 հորիզոնականով և կզբաղեցնի 58-րդ տեղը:
Առաջին 50-յակում ընդգրկված հավաքականներից ամենամեծ հետընթացն ապրել են Բելառուսի, Սլովակիայի և Ուկրաինայի ընտրանիները, որոնք համապատասխանաբար նահանջել են 15, 13 և 12 տեղով:
«Եվրո-2012»-ի ընտրական փուլի B խմբում Հայաստանի հավաքականի հետ ընդգրկված թիմերից առաջադիմել է նաև Իռլանդիայի ընտրանին. Տրապատոնիի սաները նախկին 31-րդ տեղի փոխարեն կզբաղեցնեն` 29-րդը: Ռուսաստանը կմնա նույն 13-րդ տեղում, Անդորրան կրկին վերջին` 203-րդ հորիզոնականում է: Ինչպես նշեցինք՝ Սլովակիան նահանջել է 13 տեղով և կզբաղեցնի 39-րդ հորիզոնականը: Մակեդոնիան նահանջել է 4 տեղով և կզբաղեցնի 94-րդ հորիզոնականը: