Վրաստանն այս տարի արդեն 11-րդ անգամ անցկացնում է Agile Spirit-2023 բազմազգ զորավարժությունները, որին մասնակցում են ՆԱՏՕ-ի և գործընկեր 22 երկրների 3600 զինծառայողներ: Հայաստանն այս տարի ևս չի մասնակցում զորավարժություններին, ինչպես չի մասնակցել 2017, 2019 և 2021 թվականներին:
Վրացագետ Ջոնի Մելիքյանը «Առաջին լրատվական»-ի հետ զրույցում նշեց, որ պաշտոնական Երևանի բոլոր քայլերը պետք է դիտարկել Հայաստանի ազգային շահերի տեսանկյունից. «Այստեղ առաջնայինը, որ թե ինչ-որ մեկին չզայրացնելու հարցն է, այլ այն, թե կոնկրետ զորավարժությունները որքանով են օգտակար Հայաստանի համար և ՀՀ զինված ուժերի համար: Այո, Հայաստանը տարբեր տարիների չի մասնակցել Agile Spirit զորավարժություններին, բայց մասնակցել է Global Partner-ին: Այստեղ շատ կարևոր է, որ մեր քաղաքացիները, լրագրողները հստակ հասկանան, որ տարբեր զորավարժություններ ունենում են տարբեր սցենարներ: Agile Spirit-ը մի քիչ այլ տրամաբանություն ունի: Այս տարի այդ զորավարժություններին մասնակցում են ՆԱՏՕ-ի շատ պետություններ, իսկ առաջնայինը մեր տարածաշրջանում Թուրքիան է: Այս տարվա սցենարներից մեկում Թուրքիայի տարածքի նկատմամբ ագրեսիայի կանխարգելիչ քայլերը պետք է լինեն: Մենք հստակ պետք է հասկանանք, որ երբ սցենարի մեջ լինում են այնպիսի տարրեր, որոնք մեզ որևէ բան չեն տալիս, ավելին՝ կարող են բարդացնել մեր գործընկերների հետ հարաբերությունները և հավելյալ ռիսկեր պարունակել իրենց մեջ, միշտ բերում են նրան, որ որոշ բանակցությունների արդյունքում մասնակցելու կամ չմասնակցելու որոշում է կայացվում»,-ասաց վրացագետը: