Հայաստանի պաշտպանության նախարարությունը տարածել է տեսանյութ և տեղեկություն, թե ինչպես են ադրբեջանական զինուժի զինծառայողները մոտենում դեռևս չպարզված հանգամանքներում ադրբեջանական կողմում հայտնված պահեստազորային Գ. Ո.-ին, նախ զրուցում նրա հետ, ապա ձերբակալում և մեքենայով տեղափոխում անհայտ ուղղությամբ: Այդպիսով Հայաստանի ՊՆ-ն հերքում է տեղեկությունը, որ տարածել էին ադրբեջանցիները, թե իբր կանխվել է հայկական զինուժի դիվերսիոն ներթափանցման փորձ: Դա իհարկե ադրբեջանական կողմի վաղուց հայտնի ձեռագիրն է, որ կիրառվում է մոլորված հայ զինծառայողների հանդեպ, կամ, երբ նրանք պարզապես առևանգում են հայ զինծառայողների, ինչպես եղավ ամիսներ առաջ: Այս անգամ իհարկե առևանգում չկա, բայց կան մի շարք հարցեր, թե ինչպես է հայաստանցի պահեստազորայինը, օրը ցերեկով մոլորվել և հայտնվել ադրբեջանական կողմում:
ՊՆ հաղորդագրությունը նշում է, որ քննվում են բոլոր հանգամանքները: Դա շատ կարևոր է, Ադրբեջանի կեղծիքին հակազդելուն հավասարազոր կարևորությամբ, որովհետև այստեղ խոաքը ուղիղ վերաբերում է Հայաստանի զինուժի կառավարման արդյունքին, ըստ այդմ՝ զինծառայողների և պետության անվտանգությանը: Ավելին, դեպքը տեղի է ունենում քաղաքական, և թերևս ռազմա-քաղաքական կարևորագույն պահին, երբ Հայաստանի դիմումի համաձայն կարևոր քննարկում է սպասվում ՄԱԿ անվտանգության խորհրդում, և, երբ հայտնի է, թե Ադրբեջանը որքան է շահագրգռված տապալել այդ քննարկումը, նենգափոխել դրա բովանդակությունը, բնույթը, նաև դիմել ընդհուպ շանտաժի: Ի վերջո, դրա ընդգծված վկայությունը Բաքվի ԱԳՆ հայտարարությունն էր, սահմանին հայկական զինուժի իբրև թե կուտակման կեղծ տեղեկատվությամբ: Այդ ամենից հետո, Հայաստանի զինուժը թերևս պետք է լիներ զգոնության բարձրակետում, հետևաբար առնվազն ներկայիս պահին պետք է գործնականում բացառվեին այնպիսի միջադեպերը, ինչպիսին տեղի է ունեցել պահեստազորային Գ. Ո-ի հետ: Կարևորագույն մեխանիզնը խափանում է ունենում մի պահի, երբ դրա բացառումը ընդհուպ պետական անվտանգության օպերատիվ հարց է: Սա նշանակում է, որ առկա է կառավարման լրջագույն թերացում, խափանում, որը պետք է բացահայտվի շուտափույթ, և պետք է արվեն հրատապ հետևություններ:
