ԱԺ ՀՀԿ-ական պատգամավոր Լեռնիկ Ալեքսանյանը, մեզ հետ զրույցում անդրադառնալով Կարեն Կարապետյանի հրաժարականի պատճառներին, նշեց, որ նա վարչապետ դառնալու ցանկություն չի հայտնել:
«Դա ընդամենը խոսակցություններ են: Ես բավականին մտերիմ հարաբերությունների մեջ եմ Կարեն Կարապետյանի հետ և նման ցանկություն իր կողմից չեմ տեսել: Նա նախագահի թիմի անդամ է և միշտ ասել է, որ նախագահը որտեղ հարմար կգտնի, այնտեղ էլ կգտնվեմ»,- ասաց Լեռնիկ Ալեքսանյանը:
Մեր հարցին, թե անձամբ ինքը ո՞ր ոլորտում կցանկանա տեսնել Կարեն Կարապետյանին՝ պատասխանեց. «Իմ տեսնելը մի քիչ դժվար է ասել: Նախ՝ ասեմ, որ շատ անակնկալ էր իր հրաժարականը: Բոլորիս համար էր դա անակնկալ, որովհետև ամեն ինչ անսպասելի եղավ: Տեղեկություններ, ճիշտն ասած, ինքս չունեմ, ինչ պատճառներով, ինչ, ոնց: Բայց ներկայացրեց, որ այլ բնագավառում է ցանկանում աշխատել: Բայց ես կուզեի իրեն տեսնել մեր քաղաքական դաշտում: Դժվար է որևէ ոլորտ առանձնացնել: Կցանկանայի նրան տեսնել այն ոլորտում, որտեղ որ ինքն է ուզում: Ես անձամբ իրեն շատ եմ հավանում և կուզեի, որ նա քաղաքական դաշտում լիներ: Բայց ճանաչելով նրան՝ կարող եմ ասել, որ Կարեն Կարապետյանը քաղաքական ամբիցիաներ իսկապես չունի, և չի բացառվում, որ նա այլ ոլորտ ընտրի»:
