Ես այնքան էլ համաձայն չեմ, որ մտավորականությունը հայտնվել է թիրախում, ո՞ւմ թիրախում. Մտավորականից ե՞րբ են հարցրել ինչ-որ բանը ինչպես անենք, մենք էլ չենք ասել, որ հիմա էլ գան պահանջեն: Այս մասին «Առաջին լրատվական»-ի հետ զրույցում նշեց բեմադրիչ, դերասան, Հայաստանի վաստակավոր արտիստ Դավիթ Հակոբյանը:
«Հենց հիմարությունն անում են, հետո գալիս ասում են՝ո՞ւր է մտավորականությունը: Ինձ հարցրե՞լ եք, որ արել եք այդպես, գիտնականին հարցրե՞լ եք, որ արել եք այդպես: Հիմա էլ եկել, ասում եք՝ ո՞ւր է մեր մտավորականությունը: Սա հիմնական ուշադրությունը մի կողմ տանելու համար է այս ամեն ինչը: Ո՞վ է մտավորականը և իր անելիքը ի՞նչն է վերջին հաշվով: Ես, օրինակ, խորապես համոզված եմ, որ մենք այսօր ոչ մի ուրիշ անելիք չունենք, և երբեռք էլ ոչ մի ուրիշ անելիք չենք ունեցել, ու միշտ ունենալու ենք այդ նույն անելիքը՝ կրթենք, կրթենք, կրթենք մեր սերունդներին: Ուրիշ ոչ մի բան: Մտավորականն այն է, որ մտավոր աշխատանքո՞վ է զբաղվում: Ես գյուղատնտեսներ, ֆերմերներ գիտեմ, որոնք հազարապատիկ անգամ ավելի մտավորական են, քան իմ կոլեգաներից շատերը: Թող ներեն ինձ իմ կոլեգաները»,-ասաց նա:
Դավիթ Հակոբյանի խոսքով, կրթությունը պետք է փոխվի, ինքնության վերադարձը պետք է կայանա. «Պետք է այսօր վերադառնանք դեպի ինքնություն, թե չէ դարձել ենք օմար: Օմարը, որ մի անգամ պարտվում է, նա քաշվում է մի անկյունում ու այլևս կռիվ չի մղում, նույնիսկ վախենում է կռվել նրա դեմ, ում միշտ հաղթել է, նրա ուղեղը տարալուծվում է ստրուկի ուղեղ է առաջանում: Իսկ հիմա մեզ անդադար քարոզում են՝ ուրիշ ելք չկա, պետք է հարմարվենք: Ո՞վ ասաց՝ չունենք ելք: Իսկ ելք կա. հավատալ, որ դու կարող ես, մոռացիր ստրուկի հոգեբանությունը, մոռացիր հարմարվելը, սա է իմ անելիքը»,-ընդգծեց նա:
