Հերոսների վերականգնողական քաղաք նախագիծը ստեղծվել է ճարահատյալ և ցավից ելնելով, որովհետև 44-օրյա պատերազմից հետո այլ ելք չկար, քան փակելու առողջապահական համակարգում որևէ մի բաց: Այս մասին «Առաջին լրատվական»-ի հետ զրույցում նշեց Հերոսների վերականգնողական քաղաքի հիմնադիր Սուրեն Արենցը:
«Մենք կարծեցինք, որ այդ բացը հոգեկան առողջության ոլորտում է, և ցավոք սրտի չէինք սխալվում: Ցավոք սրտի, որովհետև նմանատիպ կենտրոնների անհրաժեշտությունը այսօր Հայաստանում շատ կա: Մենք ստեղծեցինք մի կենտրոն երկու տարվա ընթացքում, որն այսօր արդեն տարածաշրջանում ունի թվայնացված տեխնոլգիաներով հագեցած սենյակներ, կենտրոն, որտեղ արդեն կա հերոսների հացատուն, որտեղ մայրերը կարողանում են ինքնավերականգնման ինքնաթերապիաներ անցնել: Այստեղ բացառապես պատերազմի մասնակից անձինք են, բացառապես նահատակված տղաների ընտանիքի անդամներն են և այն անձինք, որոնք ինչ-ինչ պատճառներով պատերազմի հետ առնչություն են ունեցել և ցավոք սրտի, ունեցել են որոշակի վիրավորումներ, հոգեբանական ու ֆիզիկական խնդիրներ»,-ասաց նա:
Իր հերթին ՀՀ ազգային հերոս Վահագն Ասատրյանի մայրը՝ Սիմա Պետրոսյանը նշեց. «Պատերազմից հետո կյանքը շարունակվում է, ես գտնում եմ, որ ոչ ոք չի զոհվել, իմ որդին իմ կողքին է, ժողովրդի կողքին է: Դրա համար, երբ ձեռնարկեցին այս գործունեությունը և դիմեցին մեզ, որդուս անունով անվանակոչելու համար, մենք չվարանեցինք: Ես դեռ չէի պատկերացնում, որ այսպիսի հզոր, գեղեցիկ կառույց է լինելու, բայց նոր էր և իմ մեջ մտած էր, որ պետք է այո, գործունեությունը ծավալել և ապրեն»:
