Վարչապետ Նիկոլ Փաշինյանը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ։Վարչապետը շնորհավորել է նախագահին Կուրբան Բայրամի առթիվ, իսկ նախագահը շնորհավորել է վարչապետին գալիք Վարդավառի՝ Հիսուս Քրիստոսի Պայծառակերպության տոնի առթիվ։Ղեկավարները քննարկել են իրենց երկրների միջև երկկողմ հարաբերությունների կարգավորման գործընթացը։ Այս համատեքստում, քննարկվել է դիվանագիտական անձնագրեր ունեցողների և երրորդ երկրների քաղաքացիների համար ցամաքային սահմանի բացման մասին պայմանավորվածության կատարման ընթացքը։ Թեմայի շուրջ «Առաջին լրատվական»-ը զրուցել է ԱԺ Քաղաքացիական պայմանագիր խմբակցության պատգամավոր Վաղարշակ Հակոբյանի հետ:
Պատգամավորի խոսքով՝ բարդ ժամանակներ ենք ապրում, փորձում ենք Հայաստանը և Արցախը դարձնել ավելի անվտանգ․ «Չնայած ծանր իրավիճակին, Փաշինյանի՝ Էրդողանին զանգը ճիշտ է: ՀՀ վարչապետի զանգը Էրդողանին կարևոր էր․ մեր երկիրը պետք է զերծ պահենք հավելյալ ռիսկերից: Թուրքիան մեծ չափով է ընդգրկված եղել 44-օրյա պատերազմին: Հայաստանի խնդիրն է առկա ռիսկերը կառավարելի դարձնել: Վարչապետի հեռախոսազանգերը ոչ բարեկամ երկրներին պետք է դիտարկել որպես ռիսկերի կառավարում: Ամեն օր պետք է ավելի մեծ քայլերով փորձենք կարգավորել խնդիրները հարևանների հետ»:
