Հայագիտության զարգացման առումով վերջին շրջանում մի քանի քայլեր են արվել. դրանցից առաջինը մատենադարանի զարգացումն է եղել Հրաչյա Թամրազյանի ղեկավարության ժամանակից: Այս մասին «Առաջին լրատվական»-ի հետ զրույցում նշեց Օքսֆորդ համալսարանի հայագիտության պրոֆեսոր Թեո Վան Լինտը:
«Մատենագիր Հայոց» շատ կարևոր շարքն է հրատարակվում: Ընդհանրապես, համաշխարհային հայագիտության մեջ երիտասարդ սերունդը շատ ուժեղ է: Նաև կարևոր է, որ հայագիտությունը կապված է ուրիշ այլ ոլորտների հետ և այդ համատեքստում ենք ուսումնասիրում հայագիտությունը: Կարևոր է հասկանալ, թե 500 կամ 3 հազար տարվա ընթացքում հայերն ինչ առնչություններ են ունեցել հարևան ժողովուրդների հետ և այդ փոխհարաբերությունները հիմա ավելի մոտիկից են ուսումնասիրվում»,-ասաց նա:
Հարցին, թե ինչպես է գնահատում հայերեի և հարևան ժողովուրդների հարաբերությունները, Թեո Վան Լինտը պատասխանեց. «Շատ ցավալի ժամանակում ենք ապրում հիմա: Ես 4 տարի չեմ եղել Հայաստանում, վերջին անգամ գիտաժողով ունեինք Արցախում՝ Մատենադարանի կողմից կազմակերպված, ինչը այսօր շատ դժվար կլիներ կազմակերպել: Հույս ունեմ, որ բարեփոխումներ ենք տեսնելու, որ գոնե Արցախը մնա հայաբնակ, որին այսօր մեծ վտանգ է սպառնում»:
