«Այսօր Մերձավոր Արևելքը ալեկոծվում է, և այստեղ տեղի են ունենում լուրջ վերաձևումներ: Մենք այդ ակտիվ աշխարհաքաղաքական գեոսեյսմիկ գոտու անմիջական մոտակայքում ենք գտնվում, և պետք է հասկանանք, որ աշխարհում երբևէ չեն եղել մեկընդմիշտ հաստատված իրողություններ` ամեն վայրկյան պետք է պատրաստ լինենք ցանկացած շրջադարձի, նաև պատերազմի, թեև պատերազմին պատրաստ լինելն ավելի հեշտ է, քան ապրել խաղաղության մեջ»,- խոսելով ԼՂ հարցի կարգավորման մասին՝ լրագրողների հետ հանդիպման ժամանակ նշեց ԼՂՀ նախկին արտգործնախարար Արման Մելիքյանը:
Նա նշեց, որ այսօր ղարաբաղյան հիմնախնդիրը վերահսկելու գործառույթը ո՛չ Հայաստանում է, ո՛չ Ադրբեջանում, ո՛չ էլ Արցախում: Ըստ Մելիքյանի՝ մենք կարող ենք մեր թատրոնն անել այստեղ, Բաքուն՝ այնտեղ, բայց այս գործընթացը կառավարվում է արտատարածաշրջանային ուժերի կողմից. «Թե՛ Երևանը, թե՛ Բաքուն, թե՛ Ստեփանակերտը ստիպված են հաշվի նստել այն տեսակետների հետ, որոնք պարտադրվում են Մոսկվայից, Վաշինգտոնից, Բրյուսելից կամ Փարիզից»:
Պատերազմի վերսկսման հավանականությունը ևս, ըստ Մելիքյանի, կապված է դրսից եկող ազդակների և դրսի ուժերի փոփոխության հետ: Առաջիկա մեկ տարվա համար պատերազմի վերսկսման համար նախադրյալներ Մելիքյանը չի տեսնում:
Մելիքյանի գնահատմամբ՝ մինչև Հայաստանը չունենա սեփական դիրքորոշումն ու առաջարկությունները և մինչև չփորձի դրանք առաջ տանել միջազգային հարթակում, այսօրվա վիճակը կպահպանվի: Մելիքյանը նաև նկատեց, որ, թերևս, ներկայիս վիճակն ամենաշահավետն է գործող իշխանությունների համար, այդ պատճառով էլ չեն փոխում:
