«Եթե հաշվի առնենք այն հանգամանքը, որ Ռուսաստանը, որն առ այսօր ստանձնել էր Հայաստանի և Ադրբեջանի ղեկավարների հանդիպումները կազմակերպողի դերը, չկարողացավ շոշափելի արդյունքների հասնել, ապա գուցե գա պահը, որ մեկ ուրիշը փորձի այդ դերն իր վրա վերցնել` նոր մոտեցումներ մշակած լինելով»,- «Առաջին լրատվականի» հետ զրույցում, խոսելով ԼՂ հարցում Եվրամիության ակտիվացման ձգտումների մասին, կարծիք հայտնեց ԼՂՀ նախկին արտգործնախարար Արման Մելիքյանը:
Հարցին, թե հնարավո՞ր է, որ Եվրամիությունն է ձգտում ստանձնել այդ դերը, Մելիքյանը պատասխանեց. «Ես կարծում եմ, որ կարող է այդպիսի պահ գալ, քանզի այսօր փոփոխությունների անհրաժեշտությունն ակնհայտ է:
Ըստ Մելիքյանի՝ այստեղ ամբողջ խնդիրն այն է, թե ինչպիսի շահեր կտեսնի Եվրամիությունը և ով այդ շահերն առաջ կտանի Հարավային Կովկասում:
ԼՂՀ նախկին արտգործնախարարը նկատեց, որ ԵՄ քաղաքականության հնարավոր փոփոխություններից կլինի նաև այն, որ եթե ժամանակին Եվրամիության ներկայացուցիչ Փիթեր Սեմնեբին զլանում էր այցելել Արցախ, ապա այժմ գուցե ԵՄ ներկայացուցիչներն ավելի անմիջական շփումներ հաստատեն ԼՂՀ իշխանությունների և հանրության հետ. «Դրանք կարգավորման նոր մեխանիզմներ ի հայտ կբերեն, թե ոչ՝ դեռ վաղ է խոսել, որովհետև ընդհանուր առմամբ կարծես թե բեկումը հասունացել է և նոր գաղափարների ու մոտեցումների անհրաժեշտություն կա»:
Մելիքյանը նաև նկատեց, որ այսօր կան նաև նախանշաններ, որ որոշակի պայմաններում չի բացառվում նաև ԼՂՀ-ի ճանաչումը, բայց դա կապված է ԼՂՀ-ի պետական կառավարման մակարդակի էական փոփոխության հետ:
Լուսանկարը` ARMENPRESS-ի
